BAUCAU, 27 novembru 2021 (TATOLI)–Primeiru-Ministru (PM), Taur Matan Ruak, hateten Vise-Xefe Estadu Maiór Forsa Armada Libertasaun Nasionál Timor-Leste (FALINTIL), saudozu David Alex ‘Daitula’ nia mate folin boot iha istória Estadu Repúbliku Demokrátiku Timor-Leste (RDTL).
“Ba ita-nia ukun-an Daitula folin boot, Timor-oan rihun ba rihun mate inklui Daitula, maibé sira-nia mate la saugate, sira fó hela nasaun ida ba ita-sira, fó hela rai ida ba ita, hanesan ha’u bainbain dehan sira mate atu nasaun iha, sira mate atu ita moris, sira-ne’ebé moris serbisu sei todan ba ita hotu, ita labele haluha, banati tuir sira-nia ezemplu hodi tau-matan ba ita-nia nasaun,” PM Taur, ko’alia iha serimónia reflesaun David Alex Daitula ne’ebé hala’o iha aldeia Woraiteti, suku Caibada, postu administrativu Baucau, munisípiu Baucau, sábadu ne’e.
Xefe Governu husu ba povu Timor-Leste tau-matan ba nasaun iha forma ida di’ak, kontibui pás no estabilidade ba nasaun atubele iha kbiit halo dezenvolvimentu ba rai ida-ne’e.
“Tau-matan ho forma hanesan hadi’a eskola sira atu ita-nia oan-sira estuda sai matenek, hadi’a klínika, ospitál atu ita moras tau-matan ba ita, hadi’a ita-nia to’os, natar-sira atu ita labele hamlaha, hadi’a ita-nia estrada, bee-moos, eletrisidade atubele muda ita-nia moris. Sé ita fó ita-nia kontribuisaun hodi hametin pás no estabilidade,” Xefe Governu ne’e haktuir.
Nune’e Timór-oan hirak-ne’ebé sei moris tenke banati tuir buat-ne’ebé eroi no eroína sira, nune’e lori Timor-Leste ba prosperiedade.
“Bainbain ita-nia aman sira dehan, ba buat-ne’ebé mak di’ak ita tenke tau-matan di’ak, ita-nia sasán sira-ne’ebé mak ita lori osan mak sosa, ita tau-matan tanba dala barak ita dehan ne’e karun, tanba ne’e haree didi’ak, maibé kuandu ko’alia kona-ba ita-nia nasaun nia karun liu fali tanba la lori osan mak sosa maibé lori mate mak sosa,” Eis Prezidente Repúblika ne’e subliña.
Biban ne’e, Xefe Ezekutivu ne’e agradese ba komisaun organizadora, inan-aman sira hotu ne’ebé mak organiza ona seremónia ne’ebé ho sentidu no simboliza maka’as kona-ba istória no atubele halibur Timor-oan hotu hodi halo reflesaun iha ámbitu komemorasaun loron Proklamasaun Unilaterál Independénsia ba dala-46 (1975-2021).
PM konta istória Daitula
Daitula hola parte lideransa FALINTIL nian ne’ebé komposta hosi ema na’in-haat, Xanana Gusmão nu’udar Komandante Ein-Xefe, Taur Matan Ruak nu’udar Xefe Estadu Maiór, Tenente Jenerál Lere Anan Timur hanesan Vise-Xefe Estadu Maiór no David Alex ‘Daitula’ nu’udar vise-xefe Estadu Maiór.
“Ha’u ko’alia uituan oinsá istória, planu Estadu Maiór nian maibé planu kona-ba maun Daitula-nia mate iha komandante sira, ne’ebé momentu ne’ebá sira fó seguransa, sira hatene liu ha’u. Maibé momentu ne’e ha’u subar ho maun Daitula. Ami subar iha área Uailili-Baucau nian, iha tinan 1997 iha tempu eleisaun entaun Estadu Maiór deside atu perturba, impede, difikulta eleisaun iha momentu ne’ebá entaun fó orden ba forsa sira hotu para, kuandu to’o iha eleisaun tenke halo operasaun,” Taur konta. Entaun iha-ne’e, maun Daitula ho ekipa prepara fatin atu halo preparasaun no fatin maka estrada Waiaka-Quelekai, kuandu iha ema lubuk ida mate entaun deside ha’u sai, antes halo operasaun.
Nune’e, ha’u-nia estruturasaun hateten, bainhira halo operasaun hotu karik iha fatin-fatin tiru malu hotu, sira bele kontinua haree tan alvu no ha’u momentu ne’ebá husu ba maun Daitula, nia hateten katak ita iha alvu rua, ida ba Laga no ida ba Waiaka.
Entaun ha’u hateten, karik iha fatin hotuhotu tiru-malu entaun imi bele kontinua nafatin, tanba sé lae inimigu bele fó atensaun ba imi. Entaun momentu ne’ebá husu ha’u sees antes sira ba halo operasaun, atu sees ba ne’ebé, primeiru ha’u atu mai subar iha Kaibada.
Nune’e iha loron 25 juñu 1997 rona katak Daitula ema kaer, ema kaer iha duni fatin ida-ne’e (Kaibada) entaun ha’u hosi Boilor ba fali Larigutu.
Jornalista : Antónia Gusmão
Editór : Evaristo Soares Martins
