DILI, 04 janeiru 2022 (TATOLI)– Sekretáriu Jerál Asosiasaun Futsál Timor-Leste (AFTL), Fernando Baptista, informa, planu ona atu realiza liga futsál daluluk iha abril tinan ne’e.
“Ita nia planu fiksu ona atu hala’o liga futsal iha fulan abríl nia laran, maibé karik jogu internasionál ruma iha entaun adia ba maiu,” Sekretáriu Jerál AFTL ne’e, hateten ba Agência TATOLI iha resintu FFTL-Dili, tersa ne’e.
Notísia Relevante: Ramelau FC kampiaun iha Pra-Liga Futsal Timor-Leste
Liga ne’e sei hetan apoia fundu másimu hosi Federasaun Futeból Timor-Leste (FFTL).
“Ita sei hetan apoiu masimu hosi FFTL maibé montante osan hira-hira ita sei diskute hela, los ona ami sei fó sai fali ba públiku. Ita mós sei halo proposta ba Sekretáriu Estadu Juventude no Desportu (SEJD) atu husu sira nia apoia,” nia akresenta.
AFTL bele halao liga ona tanba iha tinan kotuk realiza ona pra-liga durante tinan tomak no iha klube hamutuk 24, hosi númeru ne’e, klube 10 mak konsege utrapasa ba primeira divizaun no klube 14 iha segunda divizaun.
Klube hirak ne’ebé iha direitu absoluta partisipa iha Liga Futsál 2022 iha jogu primeira divizaun hanesan, Ramelau FC, Mushila FC, Mauputar FC, Becusse United, Boa Sorte FC, São Francisco FC, Caesardante FC, AD Samoro, Gamer FC no Jerman FC.
Enkuantu, klube sira iha segunda divizaun hanesan, Coelho FC, Bermeta FC, M-VDL, Santa Cruz FC, Maudoko FC, Boavista FC Timor, Kuda Ulun FC, Crazy Horse, FIEL FC, Estrela Baguia FC, Baucau All Star, B’Tal FC, Kablaki FC no Academica FC.
Entretantu, kampu ne’ebé atu realiza jogu ne’e AFTL nafatin uza kampu futsál FALINTIL-Forsa Defeza Timor-Leste (F-FDTL) Fatuhada Dili.
Notísia Relevante: Venceslau Guterres sai mellor markadór iha Pra Liga Futsal
Jornalista : Hortencio Sanchez
Editór : Florencio Miranda Ximenes
