DILI,10 janeiru 2021 (TATOLI)—Tuir dadus estatístika, Ministériu Saúde liuhosi Diresaun Nasionál Saúde Públika liuliu Departamentu Vijilánsia Epidemolójia, iha semana dahuluk, fulan-janeiru ne’e, rejista kazu dengue iha territóriu nasionál hamutuk 174, hosi númeru ne’e, mate na’in-ida.
“Iha loron 09 janeiru 2022, kazu dengue hamutuk 174 no kumulativu óbitu nain-ida. Maioria kazu ne’e deteta husi Munisípiu Dili ho totál 158 kazu, hafoin Munisípiu Manatutu ho kazu neen hafoin Munisípiu Covalima ho totál kazu lima, Viqueque kazu tolu no Bobonaro kazu nain-ida,” refere nota ne’ebé Agência TATOLI asesu, segunda ne’e.
Notísia relevante: MS hahú sensibiliza informasaun prevene dengue iha Dili
Daudaun ne’e, Munisípu Dili kontinua okupa númeru dahuluk ne’ebé rejista kazu dengue aas iha semana dahuluk, fulan ne’e.
Hosi ne’e, sidaudaun ne’ebé afetadu ba moras ho variante dengue ne’e hanesan labarik ho tinan 1 ho 4,6%, labarik tinan 1 to’o 4 ho 44,8%, labarik tinan 5 to’o 14 ho 44,3%, tinan 15 to’o 24 ho 4%, idade 25 to’o 49 ho 1,1%, tinan 50 to’o 59 ho 0,0% no tinan 60 ba leten ho 1,1%.
“Idade mais afetadu mak hosi idade menus hosi idade 14 mai kraik ho grupu idade 1 to’o 4 ho ho nia persentajem aas 44,8% no grupu idade 5 to’o 14 ho 44,3%,” refere nota.
Distribuisaun Kazu dengue bazeia posto administrativu iha tinan 2022 hanesan iha munisípiu Dili mak Dom Aleixo ho kazu dengue aas liuhosi postu administrativu hotu ho totál 56, Kristu Rei iha kazu 40, Nain-Feto iha kazu 30, Vera Cruz iha kazu 28, Metinaro iha kazu haat
Enkuantu iha munisípiu sira hanesan Maucatar-Covalima iha kazu na’in-ida, Suai Vila iha kazu na’in- haat, Manatuto Vila iha kazu na’in-neen, Maliana iha kazu ida, Maubara-Liquiça iha kazu ida no Uatulari-Viqueque iha kazu na’in-tolu.
Kazu obitu ba dengue iha tinan 2020 hamutuk 10, no iha tinan 2021 hamutuk 11, iha semana dahuluk fulan ne’e óbitu na’in-ida ne’ebé mak hosi munisípiu Dili.
Iha semana dahuluk, Servisu Saúde Munisípiu Dili rejsita kazu dengue iha fasilidade saúde hamutuk 158, kompostu hosi Hospitál Nasionál Guido Vaaladares (HNGV) hamtuuk 32, klínika Fatumeta 17, Sentru Saúde Comoro 15, Vera Kruz 36, Formoza na’in-26, Becora 27, Sentru Saúde Metinaro na’in-haat, no klínika Bairru Píte na’in-ida.
“Kazu dengue tuir klasifikasaun mak Dengue Fever (DF) ho totál kazu 146, Dengue Hemorrhagic Fever (DHF) ho totál kazu haat no Dengue Shack Syndrome (DSS) ho total kazu ualu,” nota klasifika.
MS apela ba populasaun
Ministériu Saúde (MS) apela ba populasaun iha Dili laran no mós iha Munisipiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran sa’e, liman-ain no sikun moras hodi bele hetan atendimentu husi profisionál saúde sira.
Apela mós ba populasaun iha Dili laran no mós iha Munisipiu sira seluk liuliu husu ba Autoridade Munisipál no Autoridades lokál atubele orienta komunidade halo limpeza jerál iha suku no bairru, fase tanke, bidon ka balde tau bee semana ida dala ida.
Hamoos sasan ka limpeza hanesan roda aat, bazu ai-funan atu susuk labele tau tolun, haloot ropa ho di’ak iha ita nia uma laran, uza ropa ne’ebé liman naruk, karik toba iha tempu loron, uza aimoruk hanesan repelente ka autan, uza muskitéru karik toba iha tempu loron no soe lixu iha nia fatin.
Notísia relevante: 2021, SSMD rejista pasiente dengue 672 no óbitu na’in-ualu
Jornalista : Felicidade Ximenes
Editór : Florencio Miranda Ximenes
