DILI, 03 fevereiru 2022 (TATOLI)— Kandidatu Prezidente Repúblika Independente 2022-2027, Virgílio Guterres no Constáncio Pinto rejista ona iha Tribunál Rekursu hodi kompete Eleisaun Prezidensiál, ne’ebé sei realiza iha 19 marsu tinan ne’e.
“Depois de iha loron rua liu , Tribunál Rekursu fó fila dokumentu, nune’e ohin kompleta ona hodi mai rejista ona iha Tribunál Rekursu no sira simu ona ami nian dokumentu, karik iha buat balun mak sira sei konfirma ho ami,” Kandidatu Prezidente Repúblika Virgílio Guterres, hateten ba Jornalista sira iha Tribunál Rekursu-Caicoli, kinta ne’e.
Notísia Relevante: Seidauk prenxe rekezitu,TR haruka fila dokumentu kandidatu Virgílio Guterres
Tuir nian, hafoin ekipa halo serbisu verifikasaun ba dokumentu lista apoiante ne’ebé antes 7.000, maibé lori proponente 6.275 mai rejista iha Tribunál.
Ho apoiante ne’e, Kandidatura ne’e fiar-an atu kompete iha iha eleisaun Prezidensiál tinan ne’e, maske la hetan apoia hosi partidu Politiku balun.
“Ami kontinua loke Komunikasaun ba kualkér partidu hodi hetan apoia, maibé ho ha’u nia kandatura ne’e ha’u fiar an atu kompete,” dehan Nia.
Nune’e, nia parte preparadu atu hasoru kampañia, tanba kampaña ne’e marka diferénsia mak hanoin no iha kampaña la presiza halo tauk malu.
Iha biban hanesan, ekipa susesu kandidatu Prezidente Repúblika Independente, Costáncio Pinto, mos rejista ona iha Tribunàl Rekursu ho apoiante 5.000-resin.
“Ohin ami rejistu ona, ami nian kandidatura Prezidente Repúblika Costáncio Pinto no ohin Tribunàl simu ona,” Portavóz ekipa susesu, Adi Pinto hateten.
Apoiante 5.000-resin mai hosi munisÍpiu 12 inklui Rejiaun Administrativu Espesiál Oé-Cusse no Ambeno (RAEOA).
“Ami nian apoiante mesak joven no ho apoiante ne’e ami iha esperansa ba ami nian kandidatura ba para atu manán,” dehan Adi Pinto.
Notísia Relevante: Kandidatu Lere rejista ofisialmente iha Tribunál Rekursu
Jornalista: Natalino Costa
Editór : Florencio Miiranda Ximenes
