DILI, 09 fevereiru 2022 (TATOLI)—Komisaun F ne’ebé trata asuntu Saúde, Seguransa Sosiál no Igualidade Jéneru iha Parlamentu Nasionál, husu Ministériu Saúde atu aplika medida protokolu saúde ho rigór iha pontu entrada ba sidadaun sira-ne’ebé hala’o viajen hosi estranjeiru mai Timor-Leste.
Notísia Relevante: Timor-Leste rejista kazu konfirmadu pozitivu variante Omicron na’in-10
“Agora kazu COVID-19 ho virus Omicron makaas importante mak Governu tau prioridade ba iha fronteira, portu ho aeroportu bainhira ema tama tenke halo teste sériu aplika kuarantena nafatin hanesan mós ita-nia ema ba rai-li’ur. Mezmu vasina, nafatin kuarantena foin sai maibé agora ita laiha, nune’e realidade kazu Omicron existe ona,” Deputada membru komisaun F, Maria Barreto, hateten ba jornalista sira iha Parlamentu Nasionál, kuarta ne’e.
Nia husu presiza haree mós bainhira sidadaun sira halo viajen hamutuk to’o iha aeroportu teste balun pozitivu kuandu halo auto-kuarantena mak presiza aplika mós regra protokolu saúde hanesan ba sidadaun seluk ne’ebé mai hamutuk tanba virus ne’e da’et tuir loron, nune’e labele da’et tutan.
Aleinde Governu kontinua hasa’e taxa vasinasaun no sensibilizasaun, protokulu saúde tuir Organizaun Saúde Mundiál (OMS) no Ministériu Saúde nian ba komunidade hodi prevene an hosi COVID-19.
Deputada Maria Barreto hateten, daudaun ne’e besik ona kampaña eleisaun prezidensiál no ba eleisaun ne’ebé sei halibur ema barak, nune’e presiza estratéjia Governu atua ba problema saúde públika hodi asegura ka proteje povu hotu.
Iha fatin hanesan, membru Komisaun F, Deputada Luçia Taeki hateten Governu presiza fó atensaun mós ba moras dengue la’ós COVID-19 de’it, tanba daudaun ne’e dengue rejista ho kazu makaas iha Timor-Leste no hamate mós labarik barak.
Tan ne’e, iha fiskalizasaun komisaun nian nota no husu Ministéiru Saúde presiza kria kondisaun fasilidade hanesan infraestrutura, kama ba pasiente, ekipamentu médiku, kolokasaun rekursu umanu ba iha HNGV, sentru saúde Formosa no Vera Cruz, nune’e mós akizisaun aimoruk abate hodi reforsa medida prevensaun hanesan halo fumigasaun labele fó fatin ba susuk moris, nune’e bele kombate dengue.
Notísia Relevante: Dengue ‘domina’ kapitál Dili no hamate labarik na’in-29
Jornalista : Nelson de Sousa
Editór : Cancio Ximenes
