DILI, 21 fevereiru 2022 (TATOLI)—Konsellu Nasionál Juventude Timor-Leste (KNJTL) ho koordenasaun Komisaun Nasionál Eleisaun (CNE, sigla portugés), segunda ne’e, realiza semináriu hodi sosializa edukasaun sívika ba juventude sira, ho tema ‘Hakbiit Juventude sira-nia sentidu pertense ba aktu eleitorál iha ámbitu Eleisaun Prezidensiál’.
Prezidente KNJTL, Maria Dadi Soares Magno, hateten, razaun sosializasaun ba foin-sa’e sira tanba konsidera sira hanesan ajente transformadór iha nasaun ida, tanba ne’e iha vida polítika juventude tenke hatene nia papél iha palku demokratizasaun.
“Joven iha papél importante atu ativamente foti desizaun ba Estadu iha Eleisaun, nune’e objetivu sosializa edukasaun sívika ne’e tanba Konsellu Nasionál Juventude Timor-Leste sai mahon ba juventude hotu, nune’e hanesan momentu importante tebes atu hola nia papél hanesan responsabilidade morál, atu enkoraja no motiva foin-sa’e sira, ho kamada juventude hotu, atu parstisipativu no responsabilidae iha sira-nia votu iha Eleisaun Prezidensiál no Eleisaun Parlamentár, ne’ebé sei realiza iha tinan ne’e,” Prezidente KNJTL hateten, iha salaun Komisaun Nasaionál Eleisaun (CNE, sigla portugés), Caicoli.
Notísia relevante: PR Lú-Olo husu CNE kontinua halo edukasaun sívika ba eleitór-sira
Atividade ne’e hetan partisipasaun hosi CNE, Sekretariadu Tékniku Administrasaun Eleitorál (STAE), Polísia Nasionál Timor-Leste (PNTL), Komisaun Antí-Korrupsaun (CAC, sigla portugés), inklui Komisaun Reguladora Arte Marsiál (KRAM).
Aleinde ne’e, intensaun atividade ne’e tanba konsidera metade populasaun hanesan juventude, ne’ebé sai hanesan forsa boot ida atu influénsia no muda desizaun ne’ebé mak iha Estadu.
“Hakarak ka lakohi momentu ne’e hanesan momentu ne’ebé atu sosializa, hodi fó informasaun matenek, liuhosi oradór sira atu ko’alia ba joven sira kona-ba importánsia eleisaun, tanba ne’e joven ida tenke ezerse aktu polítiku liuhosi votu, ne’ebé rasionál no ideál,” nia akresenta.
Nune’e, liuhosi sosializasaun ne’e konsellu atu halo prevensaun konflitu iha situasaun eleisaun ne’e rasik, tanba ne’e joven sira tenke hatene nia papél no direitu atu partisipa iha palku demokratizasaun ne’e.
“Bainhira joven ida ho pensamentu vizaun Estadu, nia kompreende katak iha dinámika, diferénsia no ideolójia, maibé la sai inimigu atu partisipa ho ativu ba prosesu demokrasaun ne’e. Tanba ne’e joven sira tenke respeita ema seluk nia votu,” nia tenik.
Iha biban hanesan, Prezidente CNE, José Belo, konsidera, programa edukasaun sívika ne’ebé parte rua realiza ne’e importante tebes ba joven atu asegura eleisaun.
“Fó hanoin ba oven sira katak imi mak sai futuru ba nasaun, ho pensamentu ida tenke halo di’ak liu fali joven sira iha tempu uluk, tanba iha tempu uluk iha limitasaun ba buat hotu maibé agora iha oportunidade barak, ne’ebé aproveita ho oportunidade ne’e bele kontribui ba estabilidade nasaun,” nia dehan.
Iha fatin hanesan, Eldegár Soares, ne’ebé partisipa mós sosializasaun ne’e, konsidera atividade ne’e importante tanba fó hanoin ba joven, ne’ebé iha papél boot atu kontribui ba nasaun.
“Nune’e, nu’udár juventude iha eleisaun ne’e tenke hili líder ne’ebé bele lori rai ida-ne’e ho di’ak,” nia fó hanoin.
Jornalista : Arminda Fonseca
Editora : Julia Chatarina
