DILI, 28 fevereiru 2022 (TATOLI)—Komisaun Nasionál Eleisaun (CNE, sigla portugés) akompaña ho lia-na’in sira hosi munisípiu 12 inklui Rejiaun Administrativa Espesiál Oé-cusse Ambeno, segunda ne’e, realiza seremónia asina paktu eleisaun pasífika no seremónia kulturál ba Kandidatu Prezidente Repúblika (PR) na’in-16.
Programa ne’e ho tema ‘Ho kultura ita promove pás no unidade iha Eleisaun Prezidente 2022’, ne’ebé mai ho objetivu atu lia-na’in sira tula liman ba Kandidatu PR na’in-16 no fó matak malirin iha ámbitu kampaña no eleisaun.
“Objetivu atividade ne’e nu’udar jestu responsabilidade katak atu tama kampaña no eleisaun, ita-nia kandidatu sira idaidak bele hala’o kampaña, maibé ikus sé mak manán ba timor-oan tomak,” Prezidente CNE, José Belo, hateten iha salaun Laline-Lariguto, CNE, Caicoli.
Notísia relevante: Kandidatu PR na’in-16 dada ona númeru sorteiu iha Tribunál Rekursu
Nune’e, ohin lia-na’in sira tula liman ba kandidatu Prezidente Repúblika hotu, hodi husu matak malirin ba matebian no rai lulik, atu iha ámbitu kompaña no eleisaun bele la’o ho di’ak.
“Tanba kulturál ne’e importante tebes sai kustume Timor-Leste desde beila sira-nia tempu to’o oin loron,”nia akresenta.
Iha ámbitu asina paktu eleisaun pasífiku, lia-na’in hosi munisípiu 12 inklui RAEOA, oferese bua no malus ba Kandidatu PR na’in-16, ne’ebé balun reprezenta hosi ekipa susesu.
Deklarasaun paktu eleisaun pasífika hametin paz no unidade iha eleisaun Prezidente 2022, ne’ebé Kandidatu PR sira asina iha pontu lima hanesan, dahuluk Kandidatu PR tenke kumpre Konstituisaun no lei-dekretu Governu ba iha Eleisaun Prezidensiál tinan 2022.
Rua, respeita prinsípiu universál kampaña eleitorál, tolu, promove direitu umanu no igualdade jéneru nu’udar fundasaun hodi haburas demokrasia, haat, konsidera no promove diálogu nu’udar meiu atu hametin paz, estabilidade no unidade nasionál ba dezenvolve nasaun Timor-Leste, no pontu ikus liu, prontu simu rezultadu eleisaun no kandidatu ne’ebé eleisaun nu’udar Prezidente Repúblika Demokrátika Timor-Leste ba Períodu 2022-2027.
Prezidente CNE dehan, bainhira asina paktu ne’e mak Kandidatu PR sira kontra, ei iha medida rigorozu ruma no sansaun sosiál no mós rituál.
“Tanba ne’e, husu ba kandidatu sira ne’ebé ohin simu ona bee-lulik no bua malus hodi kumpre sai ema boot tenke sai ezemplár ba ema hotu,” nia dehan.
Seremónia ne’e hetan partisipasaun hosi observadór nasionál no internasionál inklui reprezentante partidu polítiku sira.
Kandidatu PR ne’ebé partisipa asina paktu unidade nasionál mak hanesan, José Ramos Horta, Francisco Guterres Lú Olo, Felisberto Duarte, Ângela Freitas, Milena Pires, Hermes da Correia Barros ‘Sikiliras Aihai’, Tito da Costa ‘Lere Anan Timur’, Rogério Tiago de Fátima Lobato, Virgílio Guterres ‘Lamukan’, Constâncio da Conceição Pinto, Martinho Gusmão.
Enkuantu, Kandidatu PR ne’ebé la marka prezena iha seremónia ne’e mak hanesan Armanda Berta dos Santos, Isabel da Costa Ferreira, Mariano ‘Assanami’ Sabino, Antero Benedito da Silva no Anacleto Bento Ferreira.
Jornalista : Arminda Fonseca
Editora : Julia Chatarina
