DILI, 28 fevereiru 2022 (TATOLI)–Ministru Justisa (MJ), Manuel Cárceres da Costa, hato’o ona pedidu informál ba Primeiru-Ministru (PM), Taur Matan Ruak, katak sei husu lisensa hodi deskansa tanba kondisaun saúde.
“Tanba ha’u-nia saúde, ha’u husu autorizasaun ba Primeiru-Ministru atu fó tempu hodi deskansa oituan to’o rekupera tiha mak haree took fali serbisu saida mak bele halo tanba labele avansa bebeik ho moras hodi prejudika serbisu,” Ministru informa hafoin ramata reuniaun ho Xefe Governu, iha Rezidénsia Farol, segunda ne’e.
Notísia relevante: Manuel Cárceres halo mudansa ba kargu xefia iha MJ
Maski nune’e, governante ne’e seidauk relata bainhira mak sei hahú lisensa no to’o loron hira tanba sei bazeia ba atestadu médiku, hafoin ne’e sei halo pedidu formál ba Xefe Ezekutivu.
“Serbisu ne’ebé ita halo bele halo, kuandu ida ne’ebé labele tenki informa, nune’e hadi’a lai saúde, no pedidu ne’e Primeiru-Ministru aseita ona hodi husu ha’u atu deskansa lai,” nia akresenta.
Ba kestaun ne’e, Ministru garante serbisu ministériu nia sei la’o normál tanba sei substitui serbisu hosi Vise-Ministru Justisa, José Edmundo Caetano.
Relata serbisu ministériu
Iha Biban hanesan, Ministru Justisa relata mós progresu serbisu ba PM, hanesan proposta lei sira ne’ebé ministériu prepara ba Parlamentu Nasionál no foin daudaun Komisaun A ne’ebé trata asuntu Justisa no Konstituisaun, aprova tan ona Lei Advogadu no hein de’it lori ba planária hodi hetan apresiasaun.
Aleinde ne’e, Ministru informa mós katak, diploma sira ne’ebé atu implementa hanesan lei númeru 13/2017 kona-ba Terra no Propriedade prontu ona no Lei Rejistu Prediál submete ona ba Prezidente Repúblika hodi promulga.
Notísia relevante: KM aprova dekretu-lei Kódigu Rejistu Prediál
“Semana hirak mai ne’e iha Konsellu Ministru sei aprova tan dekretu-lei rua hanesan dekretu-lei informasaun kadastrál no rejime júridiku akizasaun ba sidadaun sira,” nia tenik.
Vantajen hosi dekretu-lei informasaun kadastrál mak bainhira ba sukat ema-nia rai tenki iha rejistu no informasaun kadastrál tenki rai.
“Bainhira ba sukat rai no ema ida presiza atu halo sertifikadu rai karik, ita imprime informasaun hodi entrega ba sira,” nia salienta.
Jornalista : Antónia Gusmão
Editora : Julia Chatarina
