DILI, 8 marsu 2022 (TATOLI)— Ministra Saúde, Odete Maria Freitas Belo, hala’o enkontru ho reprezentante Konferénsia Episkopál Dili, Padre Levinson Verdial, atubele transfere Amu Bispu Dioseze Maliana, Don Norberto do Amaral bá hala’o tratamentu médiku iha ospitál Malázia.
Iha enkontru ne’e, parte husi Konferensia Episkopal hato’o ba Ministra Saúde kona-ba kondisaun saúde Amu Bispu Dioseze Maliana, Don Norberto do Amaral ne’ebé di’ak no daudaun hein hela atu bá halo tratamentu iha Malázia.
“Amu Bispu nia kondisaun saúde daudaun ne’e di’ak hela, maibé sei iha buat balun presiza urjente atu bele bá Malázia hodi kontinua halo tratamentu,” refere nota ne’ebé Agência TATOLI asesu, tersa ne’e.
Nune’e, Ministra Saúde Odete sei komunika ho diresaun ne’ebé mak trata asuntu kona-ba tranferensia pasiente, nune’e sira mós bele komunika ho óspital Malázia atubele fó resposta lalais mai hodi transfere Amu Bispu bá Malazia.
Molok ne’e, Diretór Klínika Hospitál Nasionál Guido Valadares (HNGV, sigla portugés), Marcelino Correia, informa, Amu Bispu Dioseze Maliana ne’e baixa iha HNGV tanba sofre atakasaun moras tensaun (hipertensaun).
Tanba nia dehan, durante ne’e Amu Bispu sofre moras kardiovaskular, ne’ebé antes ne’e tau ona kadeli iha rai-li’ur no Amu Bispu mós nafatin halo tratamentu ba moras refere.
Partisípa iha enkontru mak Diretór Gabinete Planu Polítika Kooperasaun Saúde Narcisio Fernandes, Konferensia Episkopal Dili Idalina Freitas, Reprezentante Família Amu Bispu nian Rosalina Amaral ho Agapito da Conceição.
Notísia relevante: Don Norberto do Amaral baixa iha HNGV tanba sofre hipertensaun
Jornalista : Felicidade Ximenes
Editór : Florencio Miranda Ximenes
