Membru órgaun administrasaun eleitorál sei simu subsídiu ba atividade eleitorál
DILI, 09 marsu 2022 (TATOLI)–Governu liuhosi reuniaun Konsellu Ministru (KM) aprova Projetu Dekretu-Lei, ne’ebé aprezenta hosi Ministru Administrasaun Estatál, Miguel Pereira de Carvalho, kona-ba alterasaun dahuluk ba dekretu-lei númeru 12/2018, loron 25 abríl, kona-ba subsídiu estraordináriu ba membru órgaun administrasaun eleitorál.
“Ho alterasaun ne’e, ba oin sei atribui subsídiu ida ho valór hanesan ba Diretór Jerál Sekretariadu Tékniku Administrasaun Eleitorál (STAE) no ba Prezidente Komisaun Nasionál Eleisaun (CNE, sigla portugés) ba atividade loron-loron nian, ne’ebé partisipa durante períodu eleitorál,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: CNE-STAE esklarese aktu eleitorál ba estudante ESG Palaban
Portavóz Governu dehan, entidade sira kontratadu espesifikamente hodi apoia preparasaun no realizasaun ba aktu eleitorál, ho durasaun kontratu badak to’o fulan-neen, ne’ebé termu sei válidu tuirmai hafoin publikasaun akórdaun hosi Supremu Tribunál Justisa ho rezultadu eleisaun nian.
“Labele benefisia ba subsídiu estraordináriu, konsidera katak objetu hosi ninia kontratu, eskluzivamente atu apoia preparasaun no realizasaun aktu eleitorál, laiha medida ba ida-ne’e, tanba hanesan aumentu estraordináriu hosi serbisu,” nia akresenta.
Iha sorin seluk, Ministru Administrasaun Estatál, Miguel Pereira de Carvalho, hateten, dekretu-lei ne’e sei lori ba Prezidente Repúblika hodi hetan promulgasaun.
“Ne’e halo alterasaun de’it, nune’e ekiparadu Diretór Jerál ho Prezidente CNE. Tanba ne’e maka Prezidente CNE no Diretór Jerál kada loron $80, no kiik liu $15. Subsídiu ne’e hahú hosi loron 16 janeiru 2022 to’o loron Eleisaun Prezidensiál,” nia esklarese.
Jornalista : Antónia Gusmão
Editora : Julia Chatarina
