Prevene dengue, SSM Dili halo ona fumigasaun ba uma-kain 19.800
DILI, 09 marsu 2022 (TATOLI)—Diretora Servisu Saúde Munisípiu (SSM) Dili, Agostinha Segurado, informa hala’o ona atividade fumigasaun ba área risku sira iha munisípiu Dili kuaze uma-kain 19.800.
“Iha munisípiu Dili, ita ona halo fumigasaun ba uma-kain 19,800-resin, ne’e iha área risku sira hanesan postu administrativu Na’in-feto, Cristo Rei, Vera-Cruz no Dom Aleixo,” Diretora ne’e hateten iha kna’ar fatin-Dili, kuarta ne’e.
SSM Dili kuaje kobre hotu ona halo fumigasaun liuhosi pedidu Xefe Sentru Saúde, maibé falta Ataúro ne’ebé simu ona pedidu husi Xefe Sentru Saúde no Administradór Ataúro, nune’e semana oin, haruka ona ekipa atu ba halo fumigasaun.
“Ataúro mak seidauk halo fumigasaun, maibé planu ona semana oin sei kobre tanba iha Ataúro iha ona kazu pozitivu dengue na’in-12,” nia akresenta.
Kona-bá rekursu umanu, nia dehan Servisu Saúde Munisípiu Dili nia rekursu umanu sufisiente hela tanba apoiu másimu hosi voluntáriu Cruz Vermella Timor Leste (CVTL,sigla portugés).
“Daudaun produtu kímiku abate no malation nafatin disponivél hela hodi hatan ba servisu ne’ebé mak ita halo,” nia konklui.
Notísia relevante: Janeiru to’o marsu, dengue hamate labarik na’in-34 no pasiente 2.921
Jornalista : Felicidade Ximenes
Editór : Florencio Miranda Ximenes
