KDAI realiza forum nasionál partisipasaun feto iha vida polítika no lideransa
DILI, 17 marsu 2022 (TATOLI)—Vice-Prezidente Institutu Kdadalak ba Polítika Públika (KDAI), Angelina Baptista Branco, informa Institutu Kdadalak ba Polítika Públika (KDAI) iha kinta (17/03) ne’e realiza forum nasionál kona-ba partisipasaun feto iha vida polítika no lideransa.
Nia hateten, forum ida-ne’e sei fó espasu ba líder feto sira atu fahe sira-nia prespetiva, dezafiu, susesu no lisaun aprendizajen, ho oportunidade sira ne’e feto Timor-Leste sira enfrenta iha post- independénsia no impaktu ba iha eleisaun nasionál, no forum ida-ne’e atu halo reflesaun ida ba Timor-Leste nia situasaun no desizaun polítika sira-ne’ebé depois tinan 20 Independénsia.
“Ida-ne’e parte dahuluk ami hakarak foka liubá igualdade jeneru no involvimentu feto iha vida polítika no mós lideransa. Entaun, iha forum ohin, ami bolu moderadór sira-ne’ebé ami sente katak bele kontribui ba diskusaun ida-ne’e atu halo diskusaun ida hosi reprezentante universidade no partidu polítiku sira atu kontribui ba tópiku ida kona-bA feto nia lideransa no feto nia partisipasaun iha vida polítika,” Vice-Prezidente KDAI, Angelina Baptista Branco, hateten ba jornalista sira iha City 8, Manleuana, Dili, kinta ne’e.
KDAI sente ida-ne’e mometu ida-ne’ebé di’akliu, tanba daudaun haree hosi kandidatu Prezidente Repúblika períodu 2022-2027 iha eleisaun prezidensiál 2022 ne’e iha kandidatu feto hamutuk na’in haat.
“Hosi ne’e, ami sente katak, ida ne’e pontu no tópiku ida-ne’ebé han ba tempu ida agora daudaun,” nia dehan.
Hosi forum ne’e, KDAI hakarak foka liu-ba asuntu ne’ebé iha relasaun ba Governu nia desizaun barak ne’ebé mai hosi Governu dahuluk to’o Governu da-ualu ne’ebé bolu polítika públiku, ne’ebé iha relasaun diretamente ba asuntu hodi suporta partisiasaun feto iha polítika no mós ba lideransa.
“Hosi relátoriu ONU ni’an (2021) kona-ba partisipasaun feto sei menus profesionalmente iha vida servisu nian no mós iha vida polítika ni’an. Tanba de’it ho pandemia COVID-19 ne’ebé akontese foin lalais ne’e. Entaun, ami sente asuntu ne’e tópiku ida ne’ebé importante ba sosiedade atu halo kontinua mantein diskusaun no halo reflesaun,” nia hateten.
Diretór Asia Justice and Rights (AJAR), Jose Luis de Oliveira, hateten iha forum ida-ne’e oinsá mak atu haree knar líderansa feto iha vida polítika atu haree depois tinan 20, oinsá feto nia papel no knar iha vida polítika públika ninia progresu no dezafiu ne’e oinsá.
Nia afirma, tinan 20 Timor-Leste ukun an TL hetan ona feto barak komesa assume kargu importante hodi foti desizaun, tantu hosi Parlamentu Nasionál uluk iha kuoata 30% maibé agora liu ona, nune’e mós iha membru Governu feto barak mak asume kargu Ministra no mai iha nível Munisipál feto foin mak feto ida, maibé iha nível suku hosi 5% ne’e feto.
“Ida ne’e, ita bele dehan progresu ida-ne’ebé di’ak. Entaun, agora ita presiza oinsá atu eleva liután saida mak ita haree obstaklu no dezáfiu saida mak iha depois ita bele hadi’a,” nia dehan.
Jornalista : Nelia Fernandes
Editór : Cancio Ximenes
