MS ho parseiru lansa projetu “Codex Alimentarius” iha Timor-Leste
DILI, 28 marsu 2022 (TATOLI)—Ministériu Saúde hamutuk ho Food and Agriculture Organization (FAO) no Organizasaun Saúde Mundiál (OMS), segunda n’e, hala’o lansamentu dahuluk ba projetu Codex Alimentarius tinan 2022 too 2024 iha Timor-Leste.
Codex Alimentarius hanesan kolesaun ba padraun, kódigu prátika, diretrize no rekomendasaun ne’ebé aseitavel mundialmente relasiona ba alimentasaun, produsaun alimentár no seguransa alimentar.
“Ita hamutuk ho parseiru internasionál halo lansamentu dahuluk ba projetu CODEX alimentár tanba ita hotu hatene katak bainhira sai membru ba CODEX alimentár ne’e prosesu naruk, maibé too fim ita alkansa. Iha tinan 2018 ita sai membru ba CODEX alimentár ne’ebé nia nasaun membru hamutuk 188,” Prezidente Komisaun CODEX alimentar Timor-Leste, Odete da Silva Viegas, hateten iha nia diskursu iha Timor-Plaza-Dili.
Esforsu sai nasaun membru ba CODEX ne’e la’ós Ministériu Saúde de’it, maibé ba liña ministeriál sira hanesan Ministériu Agrikultura no Peska, Minsitériu Turizmu, Komérsiu no Indústria, Autoridade Inspesaun Fiskalizasaun Atividade Ekonómika Sanitária no Alimentár (AIFAESA) inklui parseiru internasionál sira ne’ebé mak kontribui ba papél ida ne’e.
“Ita lansa ona CODEX alimentár ne’e, signifika ita bele estabelese ita-nia sekretariadu ba iha asuntu ne’e rasik,” nia akresenta.
Estadu Timor-Leste sai membru komisaun CODEX alimentar ba membru nasaun hamutuk 188 , iha loron 20 fevereiru 2018.
“Ita hanesan nasaun foun ne’ebé sai membru presiza aprende liután ba seguransa alimentar tanba ne’e Timor-Leste adere ba iha CODEX hodi aumenta liután ita-nia partisipasaun ativu iha forum CODEX alimentar. Nune’e aproveita másimu iha prinsipiu kona-bá seguransa alimentar nomós atu defende konsumidór sira nia direitu ho objetivu atu fó protesaun ba saúde públiku no komérsiu kuantitativu iha área alimentasaun nian,” nia afirma.
Iha fatin hanesan, Reprezentante Organizasaun Mundiál Saúde iha Timor Leste, Arvind Mathur, hateten OMS fó apoia forte ida no abrajente ba servisu ne’ebé relasionadu ho seguransa alimentar iha Timor-Leste, inklui dezenvolvimentu no implementasaun estratégia nasionál hosi seguransa alimentar.
“Kampaña sensibilizasaun ba públiku ba proprietáriu hosi restaurante sira no empreza komersiál sira seluk iha nasaun hotu-hotu sei konsentra ba xave lima ba seguransa alimentar no vijilánsia ba moras transmitida ba ai-han no investigasaun ba surtu iha nível nasionál no subnasionál sira,” nia akresenta.
Orsamentu ne’ebé aloka ba iha CODEX alimentar hamutuk rihun $220 hosi Governu Timor-Leste no OMS.
Jornalista : Felicidade Ximenes
Editór : Florencio Miranda Ximenes
