Dengue hamate labarik na’in-46 iha Timor-Leste
DILI, 31 marsu 2022 (TATOLI)—Diresaun Nasionál Saúde Públika liuliu Departamentu Vijilánsia Epidemolojia iha Ministériu Saúde, relata hahú fulan-janeiru to’o horisehik pasiente dengue sa’e ba 3.808, hosi númeru ne’e labarik na’in-46 mak mate.
“Situasaun kazu dengue iha Timor-Leste, hosi janeiru mai too horisehik hamutuk kazu 3.808 no kumulativu óbitu na’in 46,” refere nota ne’ebé Agência TATOLI asesu, sesta ne’e.
Notísia relevante: Prevene dengue, SSM Dili kontinua rega susuk iha área risku
Maioria kazu ne’e deteta husi Munisípiu Dili ho totál 2.521 Baucau 239, Manatuto 169, Covalima 126, Ermera ho kazu 107, Manufahi 159,Viqueque 64, Ainaro 45, Liquiça 109, Aileu 87 no Bobonaro 43 Lautem 133 no RAEOA lima.
Munisípiu Dili nafatin rejista kazu ne’ebe a’as iha primeira semana desimu primeiru semana fulan marsu 2022, ho totál kazu 2.521 kazu. Por enkuantu nono no desimu semana kazu komesa reduz.
Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 440, Klínika Fatumeta 247 sentru saúde Comoro 861 sentru saúde Vera-Cruz 204, sentru saúde Formoza 419, sentru saúde Becora 238, Klínika Madre Eliza na’in-ida, sentru saúde Atauro 11,sentru saúde Metinaro 38 klínika Bairru-Pité 59 no Klínika Motael na’in-rua no Klínika moris foun na’in-ida.
MS apela ba populasaun
Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.
Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.
Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.
Notísia relevante: Prevene dengue, MS enkoraja komunidade halo limpeza jerál
Jornalista : Felicidade Ximenes
Editór : Florencio Miranda Ximenes
