BOBONARO, ELEISAUN

Reelitu: Lú Olo reafirma sai Prezidente Repúblika ba povu tomak

Reelitu: Lú Olo reafirma sai Prezidente Repúblika ba povu tomak

Kandidatu Prezidente Repúblika, Francisco Guterres Lú Olo, hala’o kampaña dalimak ho tipu diálogu iha jináziu, Maliana Vila, kuarta (06/04) ne’e. Imajen Tatoli/Anito Soares.

BOBONARO, 06 abríl 2022 (TATOLI)—Kandidatu Prezidente Repúblika periódu 2022-2027 ho númeru sorteiu rua (2), Francisco Guterres ‘Lú Olo’, reafirma bainhira reeleitu mak sei sai Prezidente Repúblika ba povu Timor-Leste tomak.

Notísia Relevante: Lú Olo garante ona estabilidade governativa no respeitu ba konstituisaun

“Mezmu iha ha’u-nia mandatu durante tinan lima ne’ebé besik ramata iha 20 maiu tinan ne’e, halo ona buat barak hamutuk ho Governu avaliano implementa programa saúde, infraestrtura, bee-moos, halo diálogu ho ema hotu rona opiniaun no aprova dekretu atu aumenta subsídiu ba ferik-katuas, aprova dekretu subsídu ba xefe suku no aldeia, aprova dekretu subsídiu ba inan isin-rua no labarik ho sira seluk tan. Nune’e reafirma ha’u-nia kandidatu mandatu daruak bainhira reeleitu sei sai PR ba povu Timor-Leste tomak hodi servisu ho di’ak liután ho instituisaun sira seluk ba povu nia moris di’ak,” Lú OLo hateten bainhira hala’o kampaña ho tipu diálogu iha jináziu Maliana Vila, kuarta ne’e.

Durante nia mandatu hasoru dezafiu barak hanesan ho situasaun polítika no pandemia COVID-19 maibé nia konsege hola desizaun hodi hametin pás no estabilidade iha Timor-Leste.

“Povu nafatin hakmatek estabilidade tanba sempre iha pasiénsia tebes duni iha situasaun naksalak bele hasoru maibé ha’u fiar metin ba povu ida-ne’e nia votu ba ukun tinan lima la halo susar povu,” nia dehan.

Prezidente Repúblika ógaun aas tebes liuhosi eleisaun livre no hetan lejitimidade hosi povu maibé iha relasaun instituisional hanesan ho ezekutivu haree polítika jerál iha área saúde, edukasaun, bee-moos no seluk tan hodi bele tau atensaun ba povu nia moris.

Tanba ne’e, sei hametin relasaun instituisional ho kumpre de’it knar tuir konstituisaun hodi la hakruk ba ema ida no promove diálogu hodi kria pás no estabilidade, no garante dezenvolvimentu sustentavél no integradu.

Kampaña ne’e hetan supervizaun hosi Komisaun Nasionál Eleisaun (CNE, siglá portugés), observadór internasionál, no hetan seguransa másimu hosi Polísia Nasionál Timor-Leste (PNTL), Komandu PNTL Munisípiu Bobonaro.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!