Médiku espesialista Kubanu na’in-25 ramata misaun iha TL
DILI, 07 abríl 2022 (TATOLI)—Diretór Klínika Hospitál Nasionál Guido Valadares (HNGV) Marcelino Correia, informa Brigada médiku espesialista Kubanu na’in-25, iha etapa dalimak, ramata ona nian-misaun iha Timor Leste.
“Ohin sira-nia misaun ramata atu sira fila, hafoin nia subtituisaun mai fali hodi ajuda ita halo tratamentu saúde ba pasiente sira,” Diretór Klíniku HNGV ne’e hateten hafoin halo despedida ho médiku sira ne’e iha HNGV, kinta ne’e.
Notísia relevante: Médiku espesialista Kubanu 116 mak servisu iha TL
Médiku espesialista hirak ne’e apoia HNGV iha área interna, ICU, pediatria, Emerjénsia, neurolojia no iha situasaun COVID-19 hala’o atendimentu ba pasiente COVID-19 iha izolamentu Vera-Kruz.
“Ita agradese tebes médiku espesialista na’in-25 ne’e tanba ajuda tebes ita hodi halo tratamentu ba pasiente sira,” resposavél ne’e agradese.
Iha biban hanesan, Koordenadora Brigada Médikaa Kubanu, Elba Cabrales Riquenes, dehan maske misaun ramata ona, maibé sente kontente hodi apoia Timor-Leste liuhosi HNGV hodi fó tratamentu saúde ba pasiente sira.
Koordenadora Brigada Médikaa Kubanu, Elba Cabrales Riquenes. Imajen/Felicidade Ximenes.
“Ami serbí timoroan sira ho ami-nia fuan hodi salva ema barak nian-vida. Ami sei saudades ba Timor-Leste,” Koordenadora afirma.
Koodenadora Riquenes mós hato’o ninia agradesimentu ba Diretór Hospitál Nasionál Guido Valadares (HNGV) ba suporta tomak ne’ebé mak sira simu durante sira-nia misaun iha Timor-Leste.
“Ami mós hakarak hatoo ami-nia agradesimentu no apresiasaun ba suporta tomak ne’ebé mak ami simu husi kolega Doutór timoroan sira. Obrigado tanba simu ona ami iha família boot ida ne’e, hodi serbisu nu’udar Doutór iha Timor-Leste no bainhira ami too iha Kuba ami sei hanoin nafatin Timor-Leste,” nia agradese.
Notísia relevante: Kuba Kontinua iha Kompromisu Ajuda TL
Jornalista : Felicidade Ximenes
Editór : Florencio Miranda Ximenes
