DILI, 11 abríl 2022 (TATOLI)— Diretór Klínika Hospitál Nasionál Guido Valadares (HNGV), Marcelino Correia, informa maske Deputadu Parlamentu Nasionál hosi Partidu Demokrátiku Ernesto Fernandes “Dudu” kontinua baixa iha HNGV, maibé kondisaun saúde hatudu progresu pozitivu.
“Ha’u hanoin veteranu “Dudu” nia kondisaun hatudu progresu di’ak no iha faze rekuperadu tanba médiku espesialista sira kontinua hala’o tratamentu normál liuliu foku ba aimoruk antibiótiku,” Diretór Klínika HNGV ne’e hateten ba Agência TATOLI iha nia knaar fatin-Bidau, segunda ne’e.
Membru Parlamentu Nasionál ne’e baixa iha Hospitál Nasionál Guido Valadares iha loron 06 abríl 2022 too ohin iha sala internamentu VIP tanba sofre moras infessaun pulmaun.
Responsavél ne’e dehan, daudaun hein hela karta hosi Ministériu Asuntu Kombatente no Libertasaun Nasionál (MACLN) atu transfere Deputadu ba halo tratamentu iha ospitál rai-li’ur.
“Ami seidauk simu karta ruma husi parte relevante sira atu transfere ba estranjeiru, nune’e ami kontinu haruka médiku espesialista halo nafatin nafatin iha ne’e,” nia informa
Notísia relevante: Deputadu “Dudu” baixa iha HNGV tanba sofre infessaun pulmaun
Jornalista : Felicidade Ximenes
Editór : Florencio Miranda Ximenes
