Tinan ne’e, MS-Ospitál Malázia instala mákina diagostika pasiente moras fuan
DILI, 12 abril 2022 (TATOLI)— Ministériu Saúde (MS) selebra ona akordu ho Ospitál Malázia liuhosi iHeal Medical Centre, tinan ne’e, hahú instala mákina-ECG eletrocardiograma hodi fasilita halo diagnostika ba pasiente moras fuan.
“Ita serbisu hamutuk ho Hospitál Malázia liuhosi ajénsia iHeal Medical Center atu instala mákina instala ekipamentu médiku iha sentru kardiolojia Ospitál Nasionál Guido Valadares hodi halo diagnostika ba pasiente kardiavaskular,” Minsitra Saúde, Odete Maria Freitas hateten iha Pálasiu Governu, kuarta ne’e.
Polítika instalasaun mákina ne’e, Minsitra Saúde dehan tanba Governu hakarak redús kustu transfere pasiente ba rai li’ur tanba diagnostika ba moras refere ho kustu boot.
Daudaun ne’e, ekipa tékniku hosi iHeal Medical Centre iha ona Timor-Leste hodi fó formasaun ba HNGV, molok halo instalasaun ba mákina refere.
Governu mós aloka ona orsamentu milliaun $1-resin hodi sosa ekipamentu liuliu bele tau kadelia ba pasiente sofre moras fuan iha Timor-Leste no la presiza ba rai li’ur.
“Ami mós koloka ona orsamentu millaun $1-resin atu sosa ekipamentu atu pasiente balun hakarak tau kadeli iha fuan, ita la presiza ba to’o iha rai liur hanesan Singapura ka Indonézia. Daudaun ne’e ita foku ba hadi’a kondisaun hotu atu mellora ita nia tratamentu médiku ba sidadaun sira,” nia esplika.
Iha biban hanesan, Diretór Klínika HNGV, Marcelino Correia, informa, daudaun ne’e sentru kardilojia iha HNGV tama ona iha faze inisiu taubele halo instalasaun ba sentru kardilojia iha parte ICCU no Cath lab nian.
“Ita hamutuk ona ho ekipa iHeal Medical Centre hosi Malázia hodi prepara ba instalasaun sentru kardiolojia no fó treinamentu ba ita-nia tékniku radiogravista sira atu bainhira uza mákina ne’e ho di’ak hodi halo atendimentu ba pasiente sira,” Diretór ne’e afirma.
Daudaun ne’e, HNGV iha espesialista ba moras fuan na’in-hitu ne’ebé halo tratamentu ba pasiente moras fuan ho ekipamentu balun hosi Ministériu saúde.
Governu presiza investe ba ekipamentu médiku
Entretantu, Prezidente Asosiasaun Médiku Timor Leste (AMTL), Andre Monteiro sujere ba Governu bainhira kombate moras la hada’et iha Timor-Leste presiza apoiu ekipamentu másimu hodi fasilita médiku espesialista sira atu halo tratamentu ba pasiente sira iha rai laran.
“Kona-ba atu halo tratamentu moras la hadaet, médiku espesilista timoroan másimu hanesan Cardiologist internist no neurologist soke ami-nia ekipamentu atu suporta ami mak seidauk iha no Governu nia fiar ba ami seidauk másimu,” Prezidente Asosiasaun ne’e rekomenda.
Governu presiza investe ba ekipamentu liuliu mákina espesiál sira atu hamenus transfere pasiente moras la hada’et sira ba rai liur.
“Ita presiza mákina ida espesisífiku atu tau kadeli ba pasiente fuan sira no presiza mós ekipamentu atu ajuda halo diagnostika, hafoin monta kadeli,” nia akresenta.
Notísia relevante: MS-Ospitál Malázia selebra akordu instala mákina diagostika pasiente moras fuan
Jornalista: Felicidade Ximenes
Editór : Florencio Miranda Ximenes
