Estoke aimoruk no reajente iha armazein SAMES hahú menus
DILI, 22 abríl 2022 (TATOLI)— Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, hateten, estoke aimoruk hahú iha armazein nasionál hahú menus ho 48%.
“Relatoriu ikus ne’ebé mak ita simu ne’e estoke aimoruk daudaun ne’e mamuk sa’e ona ba 48% hosi númeru item 2.211 kompostu hosi medikamentu no bem konsumu médiku signifika katak situasaun estoke mamuk ne’e aumenta,” Diretór Ezekutivu SAMES hateten ba jornalista sira iha knar fatin Kampu Alór-Dili.
Aimoruk ho 48% ne’ebé stock out mamuk tuir lista esensiál medikamentu, hanesan aimoruk konsumu no reajente ba laboratóriu Nasionál Saúde.
“Ita halo esforsu liuhosi prosesu deliberasaun iha aprovizionamentu, maibé sei hein prosesu kuantifikasaun hosi Ministériu Saúde no Laboratóriu Nasionál Saúde (LNS) atubele loke konkursu hodi kompañia vensedór bele kompra,” nia afirma.
SAMES hetan difikuldade hodi halo prosesu aprovizionamentu tanba prosesu kuantifikasaun medikamentu ne’e atrazu hosi MS no Laboratóriu Nasionál Saúde. Tanba médikamentu ba LNS hanesan hemodialize, reajente, kardiaku, aimoruk ba saúde mentál nian.
“Ita atu loke tan konkursu tenke asegura mós ho fundu tanba atu medikamentu kompletu ne’e presiza orsamentu minimu millaun $10 too millaun $19, maibé ita loke prosesu aprovizionamentu mak osan minimu entaun kuantidade aimoruk mós mai oituan,” nia esplika.
Nune’e, SAMES rekomenda ona ba autoridade relevante sira liuliu Governu no Parlamentu Nasionál hodi diksute Orsamentu Jerál Estadu prevee másimu atu garante estoke aimoruk iha futuru.
SAMES ezekuta ona $887.940
Entretantu, iha trimestre dahuluk konsege ezekuta ona Orsamentu Jerál Estadu (OJE) 2022 hamutuk $887.940 ho 10%.
“Ita estabelese kontratu ne’e presiza fulan haat too lima mak aimoruk sira bele too mai entaun bainhira too mai ita halo pagamentu ba iha item sira ne’e, maibé agora daudaun trimestre dahuluk ne’e ita ezekuta ho di’ak,” nia relata.
Orsamentu fiskál tinan 2022 alokadu ba iha SAMES hamutuk $9235.500, ne’ebé fahe ba kategoria sálariu no vensimentu $608,500, bens no servisu $7,130,168, kapitál menór $415,000, kapitál dezenvolvimentu $121,832 no Transferénsia públika $960.00.
Orsamentu ba kategoria salariu no vensimentu orijen hamutuk $608.500 ne’ebé ezekuta ona $90.011 (15%), bens no servisu $7,130,168 ezekuta ona $207.929 (3%), kapitál menor $415.000 iha ona faze komitementu ne’ebé seidauk ezekuta, kapitál dezenvolvimentu $121.832 seidauk ezekuta no transferénsia públika $960.00 ezekuta ona $590.00 (61%).
Tuir dadus iha portál transparansia ne’ebé Agência TATOLI asesu hahú husi janeiru mai too ohin loron orsamentu alokadu ba SAMES hamutuk $9.235.500 ne’ebé ezekusaun atinje ona 12,1%, hanesan komprimisiu sira $6,349,697.26, obrigasaun sira $136,599.23, atuál $982,539.22 no saldu $1,766,664.29.
Jornalista : Felicidade Ximenes
Editór : Florencio Miranda Ximenes
