SAMES-ICS selebra akordu fasilita estudante halo estájiu profisionál

DILI, 22 abríl 2022 (TATOLI)— Servisu Autonómu Medikamentu no Ekipamentu Saúde (SAMES), asina akordu ho Institutu Siénsia Saúde (ICS) hodi fasilita estudante na’in-68 hala’o estájiu profisionál iha área farmasia.

“Akordu tékniku atu apoia kona-bá estudante hosi Departamentu Farmasia hala’o estájiu profisionál iha SAMES durante fulan hodi aprende prosesu aprovizionamentu, resepsaun armazenamentu no distribuisaun médikamentu iha armazein nasionál no rejionál sira,” Diretór SAMES, Santana Martins, hateten ba jornalista sira iha Kampu Alór, sesta ne’e.

Iha akordu ne’e sita mós kona-bá responsabilidade SAMES atu indika pesoál klinikál sira hodi bele akonpaña estudante sira durante estájiu.

Nune’e, Diretór ne’e sente orgullu tanba ho apoia estudante sira nia estájiu ka prátika ne’e bele aumenta sira nia kapasidade no abilidade iha tékniku farmasíatiku.

Iha fatin biban hanesan, Mágnifiku Reitór Institutu Siénsia Saúde (ICS), Domingos Soares, hateten, estudante na’in-68 sei hala’o estájiu iha SAMES tanba prosesu aprendizajen ramata ona.

“Ita nia estudante sira mai halo estájiu hodi aprende hamutuk ho SAMES iha área farmasia no sei kontinua koopera atu estudante sir abele prátika iha SAMES,”nia agradese.

Jornalista : Felicidade Ximenes

Editór       : Florencio Miranda Ximenes