DILI, 27 abril 2022 (TATOLI)–Bee Timor-Leste, Empreza Públika (BTL, E.P), kuarta ne’e, asina kontratu ho empreza rua, hodi halo reabilitasaun ba sistema bee-moos hodi distribui ba komunidade.
“Ita espera empreza rua bele ezekuta projetu ne’e ho di’ak, nune’e komunidade bele asesu bee-moos, tanba ita-nia reabilitasaun ba sistema bee-moos iha sentru Laga no Luro,” Prezidente Konsellu Administrasaun BTL, Carlos Peloi dos Reis, hateten iha salaun BTL, E.P, Caicoli.
Empreza rua ne’ebé sei halo melloramentu ba sistema bee-moos mak hanesan Ilie Chao Unipessoal, Lda hosi postu administrativu Luru, munisípiu Lautém ne’ebé reabilita sistema fornesimentu bee-moos ba komunidade Luro ho kustu ba obra $453.385,77 no empreza Suli-Bere Oan-Kiak hosi postu administrativu Laga, munisípiu Baucau ne’ebé halo melloramentu sistema bee-moos ba komunidade Laga ho kustu ba obra $212.763,03.
Notísia relavante: BTL, E.P kontrata kompañia Lia-lura dada bee-moos ba komunidade Bualale Baucau
Iha biban hanesan, Reprezentante empreza Ilie Chao, Alestino Castanheira Fernandes, hateten, kontratu ne’ebé asina ho empreza estatál ne’e, ninia implementsaun ho durasaun fulan-neen, hahú serbisu iha loron 12 maiu to’o 12 novembru 2022.
“Sei benefisia ba ita-nia komunidade uma-kain hamutuk 242 ho populasaun hamutuk 1.902,” nia akresenta.
Nune’e mós, Reprezentante empreza Suli-Bere Oan-Kiak Laga, João Gama, hateten, projetu ne’e bainhira implementa sei benefisia ba suku rua hanesan Soba no Teknomanta ho totál uma-kain hamutuk 294, totál populasaun 1.764, ne’ebé implementsaun projetu hahú loron 22 abril to’o 22 outubru 2022.
“Ami sei serbisu ho responsabilidade tuir planu ne’ebé iha, karik ami hala’o serbisu mak hasoru difikuldade ruma iha terrenu mak sei Koordenadór ho Administradór postu atu serbisu hamutuk hodi fornese bee-moos ba ita-nia Komunidade,” nia tenik.
Jornalista : Arminda Fonseca
Editora : Julia Chatarina
