BOBONARO, 27 abríl 2022 (TATOLI) – Prezidente Autoridade Munisípiu Bobonaro (PAM), Ernesto de Oliveira Barreto, apela ba komunidade sira iha munisípiu ne’e atu idak-idak hahú dada-sa’e bandeira Repúblika Demokratika Timor-Leste (RDTL) iha uma oin hodi komemora restaurasaun independénsia 20 maiu ba dala-20.
Autoridade munisipál apela ida-ne’e tanba iha tinan kotuk selebrasaun loron proklamasaun independénsia 28 Novembru komunidade iha munisípiu Bobonaro barak mak laiha konsiénsia hodi hasa’e sa’e Bandeira RDTL iha uma oin.
“Ha’u husu ba komunidade sira hotu katak iha tinan kotuk erru boot ne’ebé ita halo, labele akontese tán iha tinan ne’e, entaun hahú agora ha’u husu idak-idak tenke hasa’e ona Bandeira iha uma oin, antes tama loron 20 maiu,” nia hateten durante realiza enkontru preparasaun 20 maiu, iha administrasaun munisipál, kuarta ne’e.
Tuir nia, povu hotu tenke respeita loron 20 maiu hanesan loron importante jerasaun ba jerasaun, tanba iha tinan 20 ba kotuk mundu tomak rekoñese oan katak Timor-Leste independénsia unilateralmente ona iha mundu nia leet, hodi hari país Repúblika Demokrátika Timor-Leste ne’e hamriik ho nia soberania rasik. “Ita tenke iha sentidu nasionalizmu no patriotizmu ne’ebé forte, tanba ukun-aan ida-ne’e ita sosa ho raan no ruin, la’ós tau de’it iha bandeiza mak ema fó mai ita, ne’e duni komunidade hotu tenke hasa’e Bandeira atu dignifika no valoriza eroi sira-ne’ebé sakrifika sira-nia an, mate ba rai ida- ne’e,” nia heteten.
Nia dehan, komemorasaun 20 maiu tinan ne’e importante, tanba iha ámbitu ne’e sei fó mós pose ba Prezidente Repúblika eleitu ba períodu 2022-2027, José Manuel Ramos Horta, ne’ebé sei realiza serimónia ofisiál iha Tasi Tolu Dili, no sei komemora mós iha nível munisípiu hotu.
Tanba ne’e autoridade munisípiu sei hasai sirkulár ida hodi orienta administradór postu administrativu neen iha munisípiu ne’e atu aviza tama sai suku hotu, nune’e konsiensializa komunidade sira hasa’e Bandeira RDTL hodi selebra loron importantes ne’e.
Munisípiu Bobonaro iha postu administrativu neen mak hanesan,Atabae, Balibo, Cailaco, Maliana, Bobonaro no Lolotoé, ho totál aldeia 193 no suku 50 ne’ebé bazea ba sensu uma-kain totál populasaun 180.502 hosi uma-kain 28.810.
Jornalista : Sérgio da Cruz
Editór : Evaristo Soares Martins
