Servisu Saúde Munisípiu Liquiça selebra Loron Mundiál Saúde Orál
TIBAR, 29 abril 2022 (TATOLI)— Ministériu Saúde Timor-Leste (TL) liu husi Servisu Saúde Munisípiu Liquiça hamutuk ho NGO Timor no kompaña Unilever selebra Loron Mundiál Saúde Orál ba pasiente sira iha klinika Klibur Domin, Tibar, Dili.
Selebrasaun Loron Mundiál Saúde Orál (World Oral Health Day) ne’e halao iha klinika Klibur Domin, Tibar, Dili, sesta ohin.
Médiku Dentista husi Servisu Saúde Munisípiu Liquiça Edio do Santos ba jornalista sira dehan selebrasaun loron ne’e importante tebes ba komunidade no ema hotu iha Timor laran tomak.
“Selebrasaun Loron Mundiál Saúde Orál ne’e monu iha loron 20 marsu 2022. Maibe ita nafatin halao, tanba selebrasaun ida ne’e importante tebes ba komunidade no ema hotu iha Timor laran tomak. Tanba, Loron Mundiál Saúde Orál mak sai hanesan save ba isin lolon tomak,” dehan Edio do Santos.
Nia dehan, ho selebrasaun ida ne’e husu ba mediku dentista sira atu servisu maka’as liu tan hodi halo promosaun saúde oral nian atu hanorin no eduka komunidade atu moris saudavel.
“Atu moris saudavel mak loron ida ita kose nehan dala rua iha dader depois matabixu no kalan depois atu toba. Ida ita halo hodi prevene para la bele hamosu moras iha nehan,” Edio do Santos hateten.
Iha fatin hanesan, Representante Kompaña Unilever Lisun Timor Leste Angelo da Silva hateten, eventu ida ne’e fó hanoin ba pasiente klibur domin nian no komunidade no estudante sira atu hatoman kose nehan lor-loron.
“Ami husi Unilever Lisun espera katak eventu ne’e sei fó hanoin ba pasiente Klibur Domin nian no komunidade hamutuk ho estudante sira atu hatoman kose nehan loron ida dala rua. Ami prontu atu suporta TL ba saúde hijene komunidade sira nian. Tanba, saude orál importante ba ita nia moris,” Angelo da Silva informa.
Aleinde eventu iha Klibur Domin, Unilever Timor-Leste hamutuk ho Sentru Saúde Liquica, sei halao atividade iha eskola EBF Turliu Tibar no suporta 1.200 pasta ho eskova nehan no pasta-dente hodi fahe ba eskola EBF Turliu Tibar, Klibur Domin, Sentru Saude Liqica, Sentru Saude Bazartete, Edukasaun Municipiu Liquica, MS. Dep.non Cdc no Maluk Timor.
Partisipa iha eventu Selebrasaun Saúde Orál mak pasiente Klibur Domin, komunidade Tibar, estudante no Parseira Sira hanesan, Sentru Saúde Liquica, Sentru Saúde Bazartete, Departamentu Edukasaun Munisipiu Liquica, Ministeriu Saúde Departamentu moras la hadaet no ONG Maluk Timor, ne’ebé suporta hodi selebra Loron Mundiál Saúde Orál iha TL.
Jornalista : Felicidade Ximenes
Editóra : Armandina Moniz
