BOBONARO, 06 maiu 2022 (TATOLI) – Embaixadór Indonézia iha Timor-Leste, Okto Dorinus Manik, hamutuk ho Prezidente Autoridade Munisípiu (PAM) Bobonaro, Ernesto de Oliveira Barreto, sesta ne’e observa infraestrutura sira iha fronteira Tapo-Memo, postu administrativu Maliana no área Tursikain, Atambua, munisípiu Belu, provínsia Nusa Tengara Timur (NTT).
Vizita dahuluk ne’e parte rua haree kondisaun infraestrutura bázika irrigasaun Maliana II ne’ebé durante tinan barak abandona, nune’e ba futuru nasaun rua apoia malu konstrui sedimentasaun ida hodi fornese bee ba povu agrikulór viziñu iha fronteira ne’ebé durante ne’e halo to’os no natar.
Nune’e mós observa kondisaun merkadu tradisionál iha Turiskain, ne’ebé durante pandemia Covid-19 suspende hela, ba oin parte rua bele tau ideia hamutuk reativa nune’e bele fó biban ba komunidade sira halo atividade negósiu.
Embaixadór Indonézia, Okto Dorinus Manik, hateten objetivu hosi vizita ne’e atu hametin liután relasaun bilaterál iha fronteira terrestre entre rai-rua, nune’e ba futuru bele iha komitmentu atu lori dezenvolvimentu ba povu iha setór agrikultura no komérsiu.
“Ita-ne’e viziñu, kolega no maun-alin tanba ne’e ami mai vizita fronteira, atu nune’e bele apoiu malu no komprende malu, ba oin ita bele hadi’ak relasaun iha área negósiu. Indonézia mós bele mai no Timor mós ba, ita la’ós buka lukru ho lakon, maibé importante liu mak relasaun di’ak nafatin iha fronteira,” nia informa ba jornalista sira hafoin vizita.
Diplomata ne’e mós agradese ba autoridade munisípiu Bobonaro no autoridade seguransa sira tanba durante oras rua-resin akompaña no apioia nia komitiva tomak halo vizita hodi haree direitamente fronteira Timor-Leste ho Indonézia.
Prezidente Autoridade Munisípiu Bobonaro, Ernesto de Oliveira Barreto, sente onradu tebes tanba bele simu vizita hosi embaxadór indonézia ho nia komitiva.
“Ita bele ko’alia difikuldade povu nian, ne’ebé mak durante ne’e atravesa liu kona-bá merkadu, tanba foin lalais ita ko’alia ona kona-bá merkadu tradisionál maibé seidauk reativa tanba Covid-19, entaun ho prezensa embaixadór nian ne’e, ha’u hanoin bele loke merkadu iha sorin no iha ita nia,” nia katak.
Atvidade vizita parte Embaxadór Indonézia nian akompana hosi Atase Polisi Repúblik Indonesia (POLRI) KBRI Dili, Timor-Leste, Kombes Pol, Gaspar Maikel da Costa no hetan seguransa hosi Tentara Repúblik Indonesia (TNI) post Turiskain, kabupaten Belu Nusa Tengara Timur (NTT).
Enkuantu hosi parte Prezidente Autoridade Munisípiu Bobonaro akompaña hosi Administradór Postu administrativu Maliana, Tomás Lacu-Loe, kargu xefia sira iha administrasaun munisipál, Komandante PNTL komando munisípiu Bobonaro, Superintendente Antoninho Mauluta no hetan seguransa másima hosi membru Task-Forse no polísia Unidade Patrullamentu Fronteira, Kompañia Alfa Tunibibi.
Jornalista : Sérgio da Cruz
Editór : Evaristo Soares Martins
