iklan

HEADLINE, SEGURANSA

PNTL submete ona kazu importasaun aimoruk hosi Moris Foun ba MP

PNTL submete ona kazu importasaun aimoruk hosi Moris Foun ba MP

Portavoz PNTL, Superintendente Xefe, Armando Monteiro. Imajen Tatoli/Eugénio Pereira

DILI, 17 juñu 2022 (TATOLI)— Polísia Nasionál Timor-Leste (PNTL) liuhosi Polisia Nasionál Investigasaun Kriminál (PNSIK),  submete ona rezultadu investigasaun ka auto notísia ba kazu importasaun aimoruk hosi Klínika Moris Foun ba Ministériu Públiku atu prosesa tuir lei ne’ebé viogra iha Timor-Leste.

“Kazu importasaun aimoruk no veíkulu, ita konklui ona nia prosesu investigasaun no submete ona auto notísia ba Ministériu Públiku (MP). Nune’e ita hein fali delegasaun hosi MP atu  PNTL kontinua haree oinsá produs provas atubele aprezenta fali ba Ministériu Públiku,”Portavós Komandu Jerál PNTL ne’e, hateten ba  jornalista sira liuhosi konferénsia imprensa iha Kuartél Jerál, Caicoli-Dili, sesta ne’e.

Notísia relevante:  Kazu importasaun veíkulu, PNTL submete rezultadu investigasaun ba MP

Nune’e, PNTL lakohi pronúnsia buat ruma liga ho kazu rua refere tanba kazu ne’e iha ona institusaun seluk nia kompeténsia atu haree.

 Moris Foun komete irregularidade

Diretór Diresaun Nasionál Farmasia no Medikamentu iha Ministériu Saúde, Delfin da Costa Xavier Ferreira, hateten, tuir kontratu entre Ministériu Saúde no Farmásia Moris Foun ho katak  atu importa aimoruk  item hamutuk lima mai iha  Servisu Autonómu Medikamentu no Ekipamentu Saúde (SAMES), maibé iha tereñu la tuir legalidade ne’ebé iha.

Aimoruk item lima ne’ebé mak Farmásia Moris Foun atu importa tuir rejistu mak hanesan paracetamol, Amoxicillin+ Clavulanate potassium, Aluminium hydroxide Al(OH)3, Simethicone Mefenamic Acid+, Dicyclomine HCL no Azithromycin.

“Maibé iha prosesu libertasaun aimoruk Farmásia Moris Foun komete irregularidade, tanba iha lista item ne’e la tuir ona item aimoruk lima, maibé item aimoruk aumenta ba 12,” Diretór ne’e hateten ba Agência TATOLI, foin lalais ne’e.

Aimoruk item 12 mak hanesan Metronidazole 500 mg tablet, Griseofulvin 500mg tablet, Hyoscine butylbromide mg tablet, Finasteride 5mg tablet, Amoxiclav 625mg tablet, Ambroxol Sirup 15 mg/5 ml 60 ml, plastic 16 IV cannula, IV cannula18g, IV cannula 20g, IV cannula 22g, IV cannula 24g no umbilical cord Clamping.

Ho irregularidade ne’e, nia esplika iha sansaun tuir Dekretu-Lei númeru 12/2004 mak tenke selu koima hosi valór $1.500 too $5.000 no iha sansaun administrativu mak  bele susupende sira nia atividade inklui sira-nia lisensa.

“Maibé ba ona judisiál  parte Polisia no Tribunál mak sei aplika  kódigu penal,   ne’ebé ami la bele direita fó sansaun,” nia esplika.

Klínika Moris Foun rejista iha Diresaun Nasionál Farmásia no Medikamentu ho tipu lisensa tolu mak hanesan lisensa halo konsluta ba pasiente, farmásia ka faan aimoruk no importadór medikamentu.

Iha fatin ketak, Diretora Interina Servisu Autonómu Medikamentu no Ekipamnetu Saúde (SAMES), Saturlina Ximenes, hateten SAMES sosa aimoruk ho item 46, nune’e item ne’ebé mak la prienxe iha lista ne’e la’os kompeténsia SAMES nian.

“Kona-ba kestaun ne’e la’ós resposabilidade ami nian, maibé ne’e kompeténsia Diresaun Nasionál Farmásia no Medikamnetu nia atu kontrolu,” nia afirma.

Aimoruk item 46 ne’ebé SAMES halo akizasaun mak hanesan Bromhexine Syrup, Vitamina C no barak liu mak aimoruk konsumuvél sira.

“Ami-nia lista item ne’e ami haketak ona no entrega ba iha Diresaun Inspesaun nian bainhira sira halo hotu inspesaun entrega ba mai ami atu halo distribuisaun ba fasilidade saúde sira ne’ebé mak menus aimoruk,” nia afirma.

Jornalista : Natalino Costa/Felicidade Ximenes

Editór       : Florencio Miranda Ximenes

iklan
iklan

Leave a Reply

iklan
error: Content is protected !!