iklan

HEADLINE, MUNISÍPIU, VIQUEQUE

Reajusta PED, Autoridade munsípiu Viqueque husu tau perioridade ba estrada

Reajusta PED, Autoridade munsípiu Viqueque husu tau perioridade ba estrada

Administradór Munisípiu Viqueque, Januario Soares 'Boly'. Imajen/TATOLI

VIQUEQUE, 21 juñu 2022 (TATOLI)-Administradór munisípiu Viqueque, Januário Soares ‘Bolly’, sujere iha reajustamentu Planu Estratéjiku Dezenvolvimentu (PED) 2011-2030 presiza tau perioridade ba asuntu infraestura estrada nian.

“Ha’u hanoin atu atinje meta sira-ne’e infraestura importante tebes, tanba estrada laiha programa seluk mós ita labele dezenvolve. Tanba ne’e, ha’u husu PED 2011-2030 fó perioridade ba estrada,” Autoridade munisipál ne’e hateten iha diskusaun PED 2011-2030, iha salaun administrasaun munisipál, tersa ne’e.

Notísia relevante: Reajusta PED atu haburas dezenvolvimentu nasionál liuhosi estratejia integradu

Autoridade ne’e reforsa,  bainhira estrada di’ak hotu ona programa sira ne’ebé tuir mai, sei implementa ho di’ak hanesan planu dezenvolvimentu turizmu no edukasaun, maibé daudaun ne’e kondiasun estrada mak difikulta prosesu sira hotu.

“Se estrada maka kontinua a’at, difísil ba ita atu implementa programa sira hanesan turizmu, maski fatin turizmu ita halo di’ak maibé dalan kuandu a’at ema ba vizita mós susar,” nia tenik.

Nia dehan, Planu PED 2011-2030 iha ona maibé implementasaun tuir mai ne’e tenke konsidera estrada, daruak maka dezenvolve turizmu no agrikultura.

“Ita ko’alia agrikultura maibé bee la to’o,  tanba ne’e ita presiza konstrui barrajen hodi halibur bee atu liga ba natar. Daudaun ne’e ita depende ba fonte naturál (udan been). Ha’u hanoin dezenvolve ida-ne’e, presiza konstrusaun bee, tenki tama ba PED 2011-2030 hodi nune’e setór agrikultura ne’ebé ita hanoin dezenvolve ne’e bele la’o no sei hasa’e produsaun,” nia akresenta.

Iha biban ne’e, Ministru Koodenadór Asuntu Ekonómia (MKAE), Joaquim Amaral, rekoñese katak durante implementasaun PED 2011-2030 Timor-Leste sedauk atinje ba infraestrutura fíziku sira hanesan estrada no fasilidade edukasaun no saúde.

“Ita repete beibeik, maibé ida-ne’e nível ne’ebé ita atinje ho rajaun sira-ne’e maka lori ita atu halo reajustamentu ka redifine filafali estratejia sira no ninia alokasaun rekursu, nune’e ita bele la’o ho faze sira ne’ebé ita sukat,” nia hato’o.

Jornalista  : Vitorino Lopes da Costa

Editora      : Julia Chatarina

iklan
iklan

Leave a Reply

iklan
error: Content is protected !!