BAUCAU, 29 juñu 2022 (TATOLI) – Dirijente Eskola Báziku Filiál suku Bucoli, postu administrativu Baucau vila, munisípiu Baucau, husu Ministériu Edukasaun, Juventude no Desportu (MEJD) atu aselera konstrusaun eskola ne’ebé hetan estragu kauza hosi udan no anin-boot iha tinan 2021.
Koordenadór EBF Bucoli, Leonardo Martinho Lopes, esplika, antes ne’e anin no udan-boot ne’ebé akontese iha loron-20 fulan-dezembru 2021 rezulta uma komunidade inklui sala aula lima EBF Bucoli hetan estragu nune’e parte kompetente liuhosi MEJD deside atu konstrui foun tanba eskola refere konstrui iha tempu portugés.
“Ami presiza tebes Ministériu Edukasaun tau liman atu halo konstrusaun karik, bele lalais nune’e alunu bele aproveita prosesu aprendizajen iha tinan ida-ne’e,” Koordenadór EBF Bucoli informa Agência Tatoli iha Bucoli, kuarta ne’e.
Antes ne’e, tékniku MEJD sukat ona medida rai iha fulan-marsu no sei hahú konstrusaun ba sala aula neen iha fulan-augostu maibé to’o agora seidauk iha sinál ruma atu hahú obra refere tanba laiha liña komunikasaun entre direjente eskola ho MEJD.
Prosesu apredizajen estudante iha EBF Bucoli hala’o normal maibé impaktu tanba sala aula la sufisiente nune’e parte eskola deside fahe ba tornu rua, dadeersan no lokraik.
“To’o oras ne’e ami hein nafatin, sira promete hela sedu ka tarde sei konstrusaun iha fulan-agostu,” Leonardo Lopes akresenta.
EBF Bucoli hamutuk sala aula 10 ne’ebé daudaun ne’e funsiona no rejista estudante hosi primeiru-anu to’o nonu-anu hamutuk na’in-425 no profesór permanente na’in-sia no parsiál na’in-lima.
Notísia relevante: Edukasaun Baucau hahú rekolla dadus EBF Bucoli
Jornalista : Natalino Belo
Editór : Evaristo Soares Martins
