iklan

Uncategorized

TDD aplika TIR ba sidadaun estranjeiru nain-rua ne’ebé envolve kazu tráfiku umanu

TDD aplika TIR ba sidadaun estranjeiru nain-rua ne’ebé envolve kazu tráfiku umanu

Logotipu TDD. Imajen Tatoli/Egas Cristóvão.

DILI, 28 juñu 2022 (TATOLI)— Tribunál Distritál Dili (TDD), kuarta ne’e,  liuhosi juis singular, Alvaro Maria Freitas, aplika Termu Identidade Rezidénsia (TIR) ba arguidu na’in-rua, nu’udar sidadaun estranjeiru, ne’ebé deskonfia envolve kazu trafíku umanu no asosiasaun kriminozu.

Razaun Tribunál foti desizaun TIR tanba prova no akuzasaun ne’ebé Ministériu Públiku aprezenta ba Tribunál la komprova katak arguidu ho inisiál AES ho IGAE halo prátika tráfiku umanu.

Nune’e, Advogadu Privadu, Pedro Aparocio, hateten nia parte simu desizaun hosi tribunál ba nia kliente na’in-rua tanba laiha indísiu forte katak arguidu na’in-rua halo prátika tráfiku umanu no asosiasaun kriminozu hasoru traballadora na’in-hitu ne’ebé daudaun ‘terus” iha Dubai, Uni Emiradu Árabe.

Notísia relevante:  MP alega Prizaun Preventiva ba arguidu na’in-rua ne’ebé envolve kazu tráfiku umanu

“Desizaun ba arguidu nain-rua ne’e tribunál aplika Termu Identidade Rezidénsia (TIR), tanba laiha  indísiu krime ne’ebé maka arguidu nain-rua ne’e komete,”  Pedro Aparicio, hateten ba Jornalisra sira iha Tribunál Distritál Dili, kuarta ne’e.

Ni esplika, TIR ne’ebé parte Tribunál aplika ba arguidu nain-rua ne’e, la’ós Provizaun Aujénsia katak atu bandu arguidu sira sai hosi Timór, maibé TIR ida ne’e rasik, katak arguidu sira hakarak sai husi territóriu nasionál, antes loron 15 tenke informa ba tribunál.

“Kuandu arguidu sira atu muda sira nia hela fatin, troka númeru telefone no atu sai hosi Timor-Leste tenke informa ba iha tribunál atu tribunál hatene sira nia rezidénsia arguidu-nian,” nia informa.

Hafoin desizaun Tribunál ne’e, nia dehan sei halo karta ba Tribunál hodi  informa rezidénsia arguidu sira nian.

“Ami sei buka uma ba arguidu nain-rua atu hela nune’e sira bele kumpre prosesu TIR ne’ebé parte tribunál aplika ba sira,” Defeza ne’e akresenta.

Molok ne’e, Ministériu Públiku akuza arguidu sira ho krime tráfiku umanu ne’ebé previstu iha artigu 163 no krime asosiasaun kriminozu iha artigu 188 hosi kodigu penál Timor-Leste.

Audénsia julgamentu ne’e prezide hosi Juiz singular Alvaro Maria Freitas, Ministeriu Públiku reprezenta hosi Prokuradór Domigos Gouveia no arguidu sira hetan asisténsia hosi Advogadu Privadu Pedro Apariçio.

Notísia relevante: PCIC detein sidadaun estranjeiru na’in-rua ba kazu tráfiku umanu

Jornalista: Natalino Costa

Editór        : Florenci Miranda Ximenes

iklan
iklan

Leave a Reply

iklan
error: Content is protected !!