iklan

BAUCAU, EKONOMIA, HEADLINE, MUNISÍPIU

Tane Konsumidór hala’o advokasia iha Baucau

Tane Konsumidór hala’o advokasia iha Baucau

Asosiasaun Tane Konsumidór realiza advokasia kona-ba lei protesaun konsumidór ba ajente operadór ekonomia iha Baucau, kinta (30/06). Imajen Tatoli/Natalino Belo.

BAUCAU, 30 juñu 2022 (TATOLI) – Asosiasaun Tane Konsumidór (ATK) kinta ne’e, realiza advokasia kona-ba kualidade produtu atu hetan protesaun ba saúde, seguransa no interese ekonómika.

Prezidente Asosiasaun Tane Konsumidór, António Ramos da Silva, hateten objetivu hosi advokasia kona-ba diretu no devér konsumidor ne’ebé konsagra iha konstituisaun RDTL artigu 53 no lei númeru 8/2016, loron 8 fulan-jullu kona-ba protesaun konsumidór sira.

“Ami hala’o sesaun ida-ne’e hanesan parte hosi advokasia oinsá informa ba konsumidór no operadór sira kona-ba direitu no devér, fiar katak atividade ekonomia ne’e sei la’o di’ak,” Prezidente Asosiasaun Tane Konsumidór hateten iha Vila Nova.

Liuhosi advokasia sei fasilita informasaun ba konsumidór no ajénsia operadór ekonómika sira nune’e atividade ekonómika bele la’o saudável tanba iha entendementu durante atividade tranzaksaun.

“Tane konsumidór nia alvu mak konsumidór no ita-nia operadór ajente ekonomia sira-ne’ebé iha munisípiu tanba konsumidór no operadór ladún iha informasaun kona-ba lei ne’e rasik,”  António Ramos da Silva akresenta.

Marcelino Joaquim Pinto nu’udar jerente loja Mistériu hateten, advokasia hosi tane konsumidór inportante tanba aumenta koñesementu kona-ba papél durante hala’o atividade tranzaksaun entre fa’an no sosa na’in sira.

Konstituisaun Repúblika Demokrátika Timor-Leste iha artigu 53 kona-ba direitu konsumidór sira-nian, mak hanesan, bein no serbisu ne’ebé uza ho kualidade, hetan dalan ba informasaun loloos, proteje saúde, seguransa no ba ninia interese ekonómika.

Partisipa iha advokasia ne’e, administradór postu administrativu Baucau Vila inklui ajénsia operadór ekonómika ne’ebé halo atividade negósiu iha munisípiu Baucau.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!