iklan

DILI, EDUKASAUN

Programa “Eskola ba Uma”, suku Bemori-Caicoli identifika ona labarik 146

Programa “Eskola ba Uma”, suku Bemori-Caicoli identifika ona labarik 146

Xefe Suku Bemori, Cristalina Perreira Soares de Oliveira. Imajén/Osória Marques

DILI, 04 jullu 2022 (TATOLI)—Autoridade lokál suku Bemori no Caicoli, munisípiu Dili identifika ona labarik hosi tinan haat to’o hitu iha suku rua ne’e hamutuk 146 ne’ebé seidauk eskola atu partisipa programa “Eskola ba Uma”.

Notísia Relevante: MEJD planeia rekruta profesór voluntáriu 444 apoiu programa eskola iha uma

Programa ne’e Governu liuhosi Ministériu Edukasaun Juventude no Desportu (MEJD) atu estabelese iha tinan ida-ne’e no sei hahú hosi munisípiu Dili.

Xefe suku Bemori, postu administrativu Na’in Feto, munisípiu Dili, Cristalina Pereira Soares de Oliveira, hateten atu implementa programa “Eskola ba Uma” ne’e, suku Bemori identifika ona labarik hamutuk na’in-85.

“Labarik sira ne’e kompostu hosi aldeia Baba Liurai Leste na’in-33,  aldeia Ailele-hun na’in-27, aldeia Haas-laran na’in-21 no aldeia Pátria na’in-haat (4),” Xefe Suku Bemori ba Agência TATOLI, liuhosi telefónika.

Autoridade lokál ne’e hatutan, Aldeia Baba Liurai Oeste, aldeia Bemori Sentru no Aldeia My Friend mak labarik ho idade 4-7 laiha tanba labarik asesu hotu ba eskola formál.

Tuir nia, labarik sira-ne’e sei tuir aprendizajen iha ida-idak nia aldeia eseptu aldeia Pátria tanba labarik na’in-haat (4) de’it, entaun autoridade suku sei deside no tau hamutuk ho aldeia ne’ebé besik.

“Tanba ita-nia manorin ba kada aldeia ne’e, Governu liuhosi MEJD presiza de’it ema na’in-rua (2), nune’e ida aldeia ne’ebé labarik uituan ne’e, ha’u hanoin eskola hamutuk ho kolega sira ho aldeia ne’ebé besik,” nia informa.

Xefe Suku akresenta tan, segunda (04/07) ohin, Suku Bemori sei submete lista labarik ba Postu Administrativu atu bele prosesu tan.

Husu kona-ba bainhira mak implementa, nia hatán, tinan ne’e implementa ona maibé seidauk deside no seidauk hatene tanba sei la’o tuir nia prosesu ne’ebé MEJD estabelese.

“Ita hein de’it, bainhira mak implementa ne’e MEJD mak hatene, ita-nia knaar mak identifika labarik no profesór depois fatin atu halo aprendizajen,” nia dehan.

Entretantu Xefe Suku Caicoli, Hipólito Marques Ximenes, hateten autoridade suku identifika ona labarik hosi idade 04-07 ne’ebé seidauk eskola iha aldeia Fohi-rai ne’e hamutuk-26 no aldeia 05 hamutuk 35.

“Ita foin simu labarik hosi aldeia rua ne’e no aldeia seluk sei kontinua prosesu identifikasaun nia-laran,” nia dehan.

Kona-ba manorin, Xefe Suku ne’e hatán, seidauk tanba sei foka uluk identifikasaun labarik.

Diretór Jerál Administrasaun no Finansa, Antoninho Pires, informa programa eskola iha uma iha alokasaun orsamentu hamutuk millaun $2,3, ne’ebé prevee ona iha orsamentu retifikativu no hetan ona promulgasaun hosi Prezidente Repúblika sesante, Francisco Guterres Lú Olo.

Notísia Relevante: MEJD prevee millaun $2,3 atu realiza programa eskola iha uma

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!