BAUCAU, EKONOMIA, HEADLINE, MUNISÍPIU

PNDS sosializa UKL plus ba Autoridade Baucau Vila

PNDS sosializa UKL plus ba Autoridade Baucau Vila

Prezidente Autoridade Munisipál Baucau, Olívio 'Bou-Lesa' Freitas hamutuk ho dirijente PNDS, sosializa aktividade UKL plus ba autoridades suku sira iha postu Baucau vila, iha Vila Nova, tersa (05/07). Imajen Tatoli/Natalino Belo.

BAUCAU, 04 jullu 2022 (TATOLI) – Ekipa Programa Nasionál Dezenvolvimentu Suku (PNDS) tersa ne’e, sosializa atividade Uma Kbiit La’ek (UKL) plus kategoria B ba autoridade postu administrativu Baucau vila.

Xefe Nasionál Unidade Implementasaun no Planeamentu PNDS, Flavio Amaral, esplika, objetivu hosi sorumutu ne’e atu sosializa atividade UKL plus kategoria B ne’ebé implementa iha munisípiu 11 ho totál ordamentu millaun $12 no iha postu Baucau vila hamutuk suku 11.

Flavio Amaral, akresenta, benefisiáriu UKL plus B hamutuk 407 ne’ebé kada suku iha benefisiariu na’in-37 ne’ebé tuir planu materiál hotu sei sentraliza iha Ministériu Administrasaun Estatál (MAE) no sei kontinua distribui kada suku liuhosi kompañia lokál sira.

“Kritériu UKL + B ba komunidade ne’ebé médiu ba kraik ne’ebé konsidera hanesan UKL regulár tuir kondisaun sosiál, ekonomia no uma, ekipa tékniku sei halo verifikasaun antes deside sai benefisiáriu,” nia ko’alia iha Vila Nova, Baucau.

UKL plus iha kategoria rua hanesan A sei aloka orsamentu hamutuk rihun $13 ba kada uma, ne’ebé sei aloka ba materiál lokál inklui materiál fábrika no kustu mão de obra ne’ebé postu Baguia mak sai benefisiáriu. Enkuantu UKL+ B kada benefisiáriu sei iha direitu ba orsamentu rihun $1 ne’ebé sei aloka ba sosa materiál kalen.

Xefe suku Samalari, postu administrativu Baucau Vila, Rui Magno Sequeira, agradese ba governu no pronto kolabora ho PNDS atu identifika uma-ne’ebé kondisaun aat tuir matadalan ne’ebé iha ona.

“Hanesan autoridade lokál prontu koopera atu atinje meta governu nian nune’e labele tau povu iha kotuk,” Xefi suku Samalari hateten.

UKL plus implementa bazea ba dekretu-lei númeru 25/2022, loron 19 maiu kona-ba programa UKL plus ho objetivu konstribui ba hamenus kiak iha Timor-Leste, garante moris di’ak, iha uma-ne’ebé seguru ba ema hotu nia moris no garante ema hotu iha oportunidade atu horik iha uma ne’ebé dignu.

Rekizitu importante mak tuir kondisaun uma ba kategoria B hanesan uma fatuk, uma meia parede, kategoria sosiál mak komunidade ne’ebé iha ona uma permanente ka semí-permanente no estatutu rai tenke privadu ka eransa, laiha konflitu ka disputa, iha dokumentu legal hosi Ministériu Justisa.

Notísia relevante: Ekipa PNDS sei sensibiliza UKL+ iha semana oin

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!