Idozu no ivalidéz na’in-15.536 sei simu subsídiu iha Baucau
BAUCAU, 06 jullu 2022 (TATOLI) – Benefisiáriu hamutuk na’in-15.536 komposta hosi idozu no invalidéz sei hahú simu subsídiu iha loron sesta 07 jullu no termina iha fulan-setembru tinan-ne’e.
Diretór Servisu Munisipál Solidariedade Sosiál Baucau, Guido Ricardo Belo, esplika, prosesu pagamentu subsídiu ba benefisiáriu idozu no invalidéz tuir kalendáriu ne’ebé lansa hosi Banku Nasionál Komérsiu Timor-Leste (BNCTL, sigla portugés) sei realiza iha loron sesta 07 jullu iha suku Gariuai, postu Baucau vila no sei termina iha loron 23 setembru iha postu Quelicai.
“Prosesu pagamentu iha nível postu no direitamente ba suku sira-ne’ebé determinadu,” Diretór Solidaridade Sosiál Baucau hateten iha Vila Nova, kuarte ne’e.
Prosesu pagamentu responsabiliza hosi BNCTL, enkuantu ekipa solidariedade sei halo monitorizasaun tuir mekanismu tékniku no distribui lista pagamentu ba postu administrativu inklui karta koñesementu ba administrasaun munisipál.
Númeru benefisiáriu iha aumenta hamutuk na’in-862, antes ne’e na’in-14.474 no faze dahuluk tinan-2022 sa’e ba 15.536.
Kada benefisiáriu tenke loke bankária iha BNCTL hanesan lori kartaun eleitóral orijinál no kópia tahan-ida inklui Billeti Identidade (BI).
Enkuantu durante pagamentu benefisiáriu tenke lori livru bankária, kartaun eleitóral no BI. Ba sira-ne’ebé foun, benefisiáriu ne’ebé moras ou labele halo movimentu presiza halo karta deklarasaun suku no koñesimentu hosi administradór postu.
Jornalista : Natalino Belo
Editór : Evarista Soares Martins
