DESPORTU, DILI

Torneiu futsal BNCTL: Ekipa feminina TATOLI okupa kuatru lugar

Torneiu futsal BNCTL: Ekipa feminina TATOLI okupa kuatru lugar

Jogu Futsal femenina ekipa TATOLI,I.P, kontra ekipa PLAN Internasionál. Iha salaun Kampu Fotsal Bebora Dili, kuarta (06/07). Imajen Tatoli/Francisco Sony

DILI, 06 jullu 2022 (TATOLI)—Iha torneiu futsal Banku Nasionál Komérsiu Timor-Leste (BNCTL, sigla Portugés), kuarta ne’e, ekipa futeból feminina Agência TATOLI okupa kuatru lugar tanba lakon iha jornada ikus kontra ekipa PLAN Internasionál ho eskore 2-3.

Bainhira minutu primeiru hahú ekipa rua lansa kedan kontra no atake ba malu tuir tékniku no abilidade ekipa ida-idak nian, atubele hatama golu tuir tarjetu ne’ebé iha ona.

Ekipa TATOLI domina liu bola iha minutu primeiru hodi halo jogadora PLAN book aan araska uitoan, nune’e iha minutu neen,  jogadora TATOLI, Guilermina (11) konsege fura ona rede PLAN Internasionál hodi muda eskore ba ba 1-0.

Ho golu dahuluk ne’e, halo jogu manas liután liuhosi ekipa rua nafatin halo presaun ho ambisaun maka’as. Maske PLAN esforsu atu halo empate jogu ne’e no TATOLI buka atu aumenta golu hodi gaña vitória.

Nune’e, iha minutu 12 jogadora TATOLI, Leila Caldas (7) lansa tan golu ida ba rede PLAN hodi muda rezultadu ba 2-0.

Jogu Futsal Feto, ekipa Tatoli,I.P, kontra ekipa PLAN Internasionál. Iha salaun Kampu Fotsal Bebora Dili, kuarta (06/07). Imajen Tatoli/Francisco Sony

Golu ne’e,  halo ekipa PLAN tenke esforsu maka’as liután iha kampu laran. Esforsu PLAN nian la hela de’it hanesan esforsu tanba hatudu duni rezultadu liu hosi jogadora Maria Fatima (4) ne’ebé lansa golu dahuluk hodi muda rezultadu ba 1-2.

Enkuantu, golu hosi ekipa PLAN ne’e, halo mentalidade TATOLI nian komesa tun bebeik no la halo presaun maka’as hanesan minutu sira primeiru. Maibé minutu 20 primeira parte nian termina rezultadu mantein 1-2.

Hakat ba segunda parte ekipa rua nafatin luta, maibé PLAN halo esforsu ho korajen ne’ebé maka’as, nune’e iha minutu 25 jogadora Andrea (3) halo golu ida hatur rezultadu ba  empate 2-2. Hosi golu ne’e kontribui kedan ba hatun forsa no esforsu TATOLI nian tanba la domina ona bola iha kampu laran.

Ho fallansu ne’ebé iha jogadora PLAN uza oportunidade leet iha liña klaran hodi halo presaun no kontra atake maka’as to’o ikus iha minutu 37, jogadora PLAN, Andrea lansa sutu dook ida halo guarda rede TATOLI la antisipa bola tama liubá rede laran no árbitru deside golu hodi muda kedan eskore ba 3-2.

Golu ne’e hanesan golu ikus ba ekipa rua tanba too jogu termina laiha tan golu ruma mak akontese no vitória hela ba PLAN no TATOLI hela ho derrota no sai hanesan kuatru lugar iha torneiu futsal BNCTL 2022.

Treinadór Tatoli, Bernardo de Sousa Xavier. Imajen Tatoli/Francisco Sony

Tanba ne’e, treinadór Agência TATOLI, Bernardo Sousa, hateten jogu sempre iha lakon no manán, nune’e prontu simu desizaun ka rezultadu ne’ebé mak iha.

“Jogu ne’e sempre iha lakon no manán, ohin lakon maibé ba oin, ha’u sei hadi’a di’ak liután estretéjia jogu.  Maske lakon, maibé Ha’u nia ekipa hatudu jogu ne’ebé di’ak no espera iha eventu sira tuir mai ne’e kontinua hatudu joga bonita,” treinadór ne’e kompromete.

Iha biban hanesan, jogadora PLAN Maria Fatima, sente kontente bele hatama golu no lori PLAN Internasionál manán no hetan terseiru lugar.

Jogadora PLAN Internasional, Maria Fatima. Imajen Tatoli/Francisco Sony

“Ida ne’e la’ós fasil, maibé ami luta maka’as mak ikus mai sai terseiru lugar. Ha’u orgullu tebes. Jogu ohin ne’e tanba servisu ekipa hotu nian mak ami manán ne’e, ne’ebé agradese ba kolega jogadora sira hotu,” nia agradese.

Alende ne’e, ekipa mane ne’ebé halo jogu hodi buka terseiru lugar entre BNCTL no SEFOPE.  Nune’e ekipa BNCTL mak hetan terseiru lugar tanba halakon ekipa SEFOPE ho rezultadu eskore 3-1.

Notísia relevante:  Torneiu Futsal MAPKOMS: Ekipa feminina TATOLI hakat ba oitavu finál

Jornalista: Hortencio Sanchez

Editór        : Florencio Miranda Ximenes

iklan
iklan

Leave a Reply

iklan
error: Content is protected !!