BAUCAU, 07 jullu 2022 (TATOLI) – Autoridade Administrasaun Munisipál liuhosi Diresaun Terra no Propiedade Baucau, kinta ne’e atribui uma no rai estadu ba Agência Notisiosa Timor-Leste (ANTIL) Tatoli, I.P nune’e sai edifísiu hodi fasilita serbisu informasaun ba publiku.
Ministru ba Asuntu Parlamentár no Komunikasaun Sosiál, Francisco Martins da Costa Pereira Jerónimo, agredese ba Prezidente Autoridade Munisipál Baucau, Olívio ‘Bou-Lesa’ Freitas inklui dirijente Terra no Propiedade ne’ebé ho laran luak atribui ona uma no rai ba Tatoli hodi fasilita serbisu hosi munisipál iha futuru.
“Tinan ida-ne’e ha’u hanoin reabilitasaun bele hahú halo, nune’e bele utiliza halo serbisu iha tinan oin,” Ministru ba Asuntu Parlamentár no Komunikasaun Sosiál hateten iha Vila Nova.
Prezidente Autoridade Munisipál Olívio ‘Bou-Lesa’ Freitas sente haksolok tanba Tatoli destaka jornalista iha Baucau hodi divulga informasaun kona-ba dezenvolvimentu ne’ebé hala’o iha Baucau nune’e publika atu ema hotu akompaña dezenvolvimentu iha Baucau.
“Mídia importante liu tanba bainhira podér lokál entrega ona presiza mídia, liuliu iha dezenvolvementu,”
Prezidente Konsellu Diretivu Agência Notisioza Timor-Leste-Tatoli, Manuel Pinto, agradese ba PAM Baucau, Dirijente Terra no Propiedade, ne’ebé koopera ho Tatoli hodi atribui rai no uma ba Tatoli nune’e futuru hala’o kna’ar kontinuasaun polítika desentralizasaun administrativa.
“Urgullu tanba la’ós ami-nia esforsu mesak maibé parte hosi autoridade munisipál mós kolabora,” nia espresa.
Tuir planu tékniku hosi Tatoli sei halo levantamentu dadus inklui dezeñu uma nune’e kontinua ba reabilitasaun.
Notisia relevante: Autoridade Baucau-Agência Tatoli diskute futuru kooperasaun
Jornalista : Natalino Belo
Editór : Evaristo Soares Martins