Bobonaro rejista benefisiáriu Bolsa da Mãe Jerasaun foun 100-resin
BOBONARO, 07 jullu 2022 (TATOLI) – Diresaun Sentru Solidariedade Sosiál no Inkluzaun Munisípiu Bobonaro, rejista ona benefisiáriu ‘Bola da Mão Jerasaun Foun’ 100-resin.
Diretór Sentru Solidariedade Sosiál no Inkluzaun, Munisípiu Bobonaro, Fransisco da Costa Tilman, esplika, benefisiáriu hamutuk 100-resin iha munisípiu ne’e rejista ona iha sistema atu asesu subsídiu programa Bolsa da Mãe Jerasaun hosi Governu.
“Totál munisípiu tolu hanesan Ainaro, Bobonaro no RAEOA foin 600-resin, ba Bobonaro seidauk to’o 200, foin iha 100-resin de’it, ne’e mós bele afeta ba nia ba prosesu tanba inan isin rua sira ladún partisipa másimu,” nia informa ba Jornalista sira, iha sede suku Lahomea, kinta ne’e.
Notísia relevante: MSSI lansa programa Bolsa da Mãe jerasaun foun iha Cailaco
Nia apela ba inan isin-rua hotu iha munisípiu Bobonaro atu konsulta iha fasilidade saúde ne’ebé besik nune’e tékniku administrasaun no lojístika sira bele fasilita rejista ba sitema nune’e bele asesu programa ne’e.
Francisco haktuir, antes implementa programa ne’e parte Ministeriu Solidadriedade Sosiál no Inkluzaun (MSSI) serbisu hamutuk ho Ministériu Saúde (MS) lansa ona informasaun kobre suku 50 iha munisípiu Bobonaro ba lideransa komuinitária sira atu habelar kritéria hosi programa ne’e rasik ba komunidade sira hotu.
Nia reforsa, kritéria atu asesu subsídiu ne’e mak inan-isin rua tenke konsulta iha fasilidade saúde ne’ebé besik, lori ho dukumentu sira hanesan, Billete Identidade (BI), eleitorál, fixa família, livru inan isin-rua nia inklui konta bankária pesoál hosi Banku Nasionál Komérsiu Timor-leste (BNCTL, sigla portugés).
“Nia prosedimentu tomak mak tenke hakbesik-aan ba postu saúde, tanba atu deteta inan ida isin rua ka lae ne’e parte saúde mak hatene, ne’ebé ami atu dehan de’it katak sira-ne’ebé partu iha uma, la halo check up iha postu saúde,” nia fó hanoin.
Governu mos hatuur ona prosedimentu, matalalan kna’ar no kompeténsia entidade implementadór sira iha diploma ministeriál konjuta MSSI no Ministériu Saúde. Nune’e parte hotu sei kumpre enkuadramentu ne’ebé previstu iha dekretu lei númeru 22/2021, 10 novembru.
Programa programa Bolsa da Mãe Jaersaun foun ho objetivu prinsipál atu mellora rendimentu familiár, estímula eradikasaun pobreza no hamlaha, melloramentu saúde no nutrisaun inan isin-rua no labarik, promove atividade ekonomia lokál no hasa’e kualidade edukasaun hodi kontribui ba atinjimentu objetivu ba dezenvolvimentu sustentável.
Enkuantu valór tranferénsia maka $15 dolar kada fulan ba subsidiu inan isin-rua no $20 dolar kada fulan subsidiu ba oan ida iha 2022. Valór ne’e sei revee fila-fali no sé nesesáriu ajusta kada tinan bazea ba taxa inflasaun .
Totál benefisiáriu Bolsa da Mae Jerasaun Foun iha territóriu nasionál hamutuk 27,411 ho montante millaun $6.178 no orsamentu ne’e finansia hodi governu Austrália.
Notísia relevante:Benefisiáriu 4.000 rejistu ona ba programa “bolsa da mãe jerasaun foun”
Jornalista : Sérgio da Cruz
Editór : Evaristo Soares Martins
