Governu halo pagamantu ba idozu no invalidéz 314 iha Lahomea
BOBONARO, 07 jullu 2022 (TATOLI) – Governu liuhosi Institutu Nasionál Seguransa Sosiál (INSS) serbisu hamutuk ho Banku Nasionál Komérsiu Timor-Leste (BNCTL, sigla portugés), kinta ne’e halo pagamentu ba idozu no invalidéz hamutuk na’in-314 iha suku Lahomea, postu administrativu Maliana, munisípiu Bobonaro.
Koordernadór BCNTL Sukursál Maliana, Cesaltino dos Santos, informa mekanismu prosesu pagamentu ne’e ba direita iha idak-idak nia sede suku no balu ne’ebé asesu ona kartaun Automatic Teller Machine (ATM) bele ba foti direita iha mákina ne’ebé instala ona iha kapitál Maliana
Notísia relevante: BNCTL Maliana muda oráriu pagamentu ba idozu no invalidés
“Ohin ami halo pagamentu ba benefisiáriu hamutuk 314 kompostu hosi idozu no invalidéz, prosesu pagamentu depende ba tempu, maibé depois konklui ida-ne’e ami sei kontinua fali iha suku Ritabou tuir kalendariu ne’ebé iha tiha ona, hafoin remata iha Maliana, mak ba fali postu sira seluk,” nia informa ba Jornalista sira, iha Lahomea, kinta ne’e.
Nia subliña, ba benefisiáriu sira-ne’ebé moras labele movimenta ho distánsia dook, bele delega família rasik reprezenta maibé tenke lori ho dukumentu komprovativu sira hanesan Kartaun Eleitorál, Billete Identidade (BI) válidu no fixa família bazea ba akordu ne’ebé BNCTL no INSS asina ona iha tempu liubá.
“Sira-ne’ebé la’o ladi’ak, ami iha opsaun rua, ida sira bele aprezenta sira-nia naran liu hosi xefe aldeia no xefe suku, ami-nia funsionáriu bele direita ba sira-nia fatin, bele mós konsidera deklarasaun hosi xefe aldeia pelu vistu hosi administradór postu hodi fasilita reprezentante,” nia esplika.
Idoza suku Lahomea, Leonita da Silva, sente kontente no agradese ba VIII Governu Konstituisonál tanba iha tinan ne’e konsege hasa’e ona subsídiu hosi $30 dolar ba $50 dolar kada fulan.
“Ami idade ona ne’ebé ami presiza duni, ba ha’u la sufisiente, maibé ita-nia governu nia kapasidade mak fo ita hanesan, ha’u nafatin agradese tanba fó osan $300 dolar ona mai ami, osan sira-ne’e ha’u simu dalaruma ami idade ona, mais ami-nia oan forma hotu ona uma-kain, agora fó fali ba ami nia bei-oan sira ba eskola,” nia katak.
Tuir dadus ne’ebé BNCTL Sukursál Maliana simu hosi INSS totál benefisiáriu iha munisípiu Bobonaro hamutuk na’in-9,655 komposta hosi idozu 9,141 no invalidéz 614.
Hosi dadus ne’e mai hosi postu administrativu Atabae na’in-1,086, Balibo 1,504, Cailaco 1,112, Maliana 2,231 no postu administrativu Lolotoe hamutuk na’in-864 ho totál orsamentu $2,896,500.
Diretór Sentru Solideriedade Sosiál no Inkluzaun Munisípiu Bobonaro, Francsico Tilman, nu’udar na’in ba prosesu seidauk hetan lista editada totál benefisiáriu hosi INSS no BNCTL.
“Hau sente duvida oituan, tanba lista editadu ida-ne’e mak ha’u tenke lori ba suku sira hotu-hotu, ba postu prega tiha nune’e liurai sira bele hatene ninia komunidade sira ida-ne’ebé mak naran iha no naran la sai ne’e atubele halo reklamasaun,” nia hateten.
Nia haktuir, iha tinan kotuk ekipa konsege simu lista reklamasaun kuaze 600 aprezenta hotu ona ba INSS no hetan ona aprovasaun iha tinan ida ne’e bele simu ona sira-nia direitu, enkauntu tinan ne’e mós simu tán benefisiáriu foun hamutuk 200-resin.
“Ha’u koalia tiha ona ho notariadu, mais ita hakarak ka lakohi hanesan sidadaun ita tenke kumpre no hakruk ba lei, ne’ebé dokumentu sira-ne’e hanesan rekizitu ida, maibé agora banku sei fó oportunidade, naran katak lori identidade ida de’it simu, hotu tiha tenke ba trata ona to’o fulan maiu 2023 tenke kompleta, sé lae labele simu ona,” nia hateten.
Prosesu pagamentu ne’e observa direita ekipa INSS munisípiu Bobonaro, xefe suku Lahomea, postu administrativu Maliana, Cirilo Mau-leto no hetan seguransa másimu hosi membru Task-Force no Ofisiál Polísia Suku (OPS).
Notísia relevante: PN aprova subsídiu ba idozu hasa’e ba $50
Jornalista : Sérgio da Cruz
Editór : Evaristo Soares Martins
