MAP kontinua halo promesa reabilita irrigasaun Maliana II
BOBONANARO, 08 jullu 2022 (TATOLI) – Ministru Agrikultura no Peskás (MAP), Pedro dos Reis, kontinua halo promesa kona-ba reahilitasaun irrigasaun Maliana II, iha postu administrativu Maliana, munisípiu Bobonaro iha tempu badak.
Governante ne’e haktuir, antes ne’e kompañia Sembuhan Unipesoál Lda mak halo hela reabilitasaun ba barrajen hodi sasán mota Malibaca ne’ebé lokaliza iha suku Tapo-Memo, postu administrativu Maliana hodi salva komunidade nia natar ne’ebé sempre hetan ameasa.
Notísia relevante:Xefe suku Tapo-Memo: “Komunidade fa’an rai tanba irrigasaun Maliana II la funsiona”
Daudaun ne’e tékniku sira iha ona terrenu halo observasaun no verifikasaun ba obra refere ne’ebé mak kompañia konklui ona, nune’e iha tempu badak atu halo prosesu pagamentu.
“Depois ida ne’e hotu mak ita planu ona, atu hadia hosi Tunubibi dalan boot sa’e mai ne’e, nune’e bee ne’e ita lori hosi Malibaca ba labele mout de’it, lori sai to’o Tunubibi atu ema utiliza hodi halo halo natar, maibé ita tenke halo faze por faze,” nia informa ba Jornalista sira, iha sede suku Ritabou, hafoin partisipa lansamentu distribuisaun programa Cesta Bázika, sesta ne’e.
Irrigasaun Maliana II konstrui dezde okupasaun Indonézia iha tinan 1980 maibé konsege hetan estragu totál iha apartir 2015 nune’e obrigatóriu komunidade agrikultór sira kada tinan halo produsaun dependénsia liu ba udan-been.
Governante ne’e akresenta, planu halo reabilitasaun ba irrigasaun Maliana II ne’e governu prevee kedas orsamentu iha Orsamentu Jerál Estadu (OJE) 2021 millaun $357.
“Konstrusaun irrigasaun foun sei laiha, ita sei halo manutensaun de’it ba eskema iha Intek ida- ne’ebé mak konstrui iha tempu Indonézia nian, tanba ita seidauk iha osan sufisiente atu halo konstrusaun tomak, tanba ita hotu hatene katak Ministériu Agrikultura nia osan ne’e kada vez sa’e no kada vez tún, ida ne’e mak ita jere ba Timor laran tomak,” nia hateten.
Nia fundamenta, daudaun ne’e governu esforsu hela halo koordenasaun ho Governu Indonézia atu fahe bee iha mota Malibaca nune’e bele fornese bee ba agrikultór parte fronteira suku Tapo-Memu, Holsa no Odomau no parte Indonezia nia mak Turikain-Atambua, Kabupaten Belu, provínsia Nusa Tengara Timur (NTT).
“Bee ne’e sei fahe ba parte rua, mais nia iha vantajen di’ak tanba ita iha área kultiva boot mais bee la sufisiente, ita só udan-been atu halo natar de’it, ita bele halo irrigasaun di’ak uza ba tempu udan de’it, udan para bosok bee laiha ona,” nia afirma.
Notísia relevante:Irrigasaun Maliana II la funsiona, Natar Soso nakonu ho fatuk no rai-henek
Jornalista : Sérgio da Cruz
Editór : Evaristo Soares Martins
