Konstrusaun ESP 2 Baucau atinji pursentu 27
BAUCAU, 11 jullu 2022 (TATOLI) – Progresu konstrusaun edifísiu rua sala aula neen iha eskola Sekundária Públiku númeru 2, Vila Nova, Baucau atinje ona 27%.
Diretór ESP 2 Baucau, Pedro da Conceição Soares, esplika, konstrusaun refere hanaran Perojetu Konstrusaun no Reabilitasaun Eskolár (PKRE) ho baze komunitária tuir matadalan ne’ebé fó-sai hosi Ministériu Edukasaun, Juventude no Desportu (MEJD).
“Projetu ne’e atinje ona purvolta 27% tuir avaliasaun hosi tékniku sira,” Diretór ESP Númeru 2 Baucau, hateten iha Vila Nova, segunda ne’e.
Hosi 27% konstrui ona fondasaun, hada batako inklui cor laran, enkuantu faze daruak sei kontinua ba monta rangka, taka kalen inklu monta odamatan no janela.
Nune’e projetu refere gasta ona orsamentu 25% iha faze dahuluk hosi tótal orsamentu hamutuk $144.241,57.
Tipu serbisu komunitária forma komposta hosi eskola no inam-aman fahe ba grupu 11 hanesan grupu lima hosi eskola mak forma no neen hosi inan-aman ka komunidade.
“Ida-ne’e esperiénsia foun ba ami, susar tebes mai ami. Bainbain idak-idak ho item maibé pagamentu ba badaen laiha. Ida-ne’e sai problema tanba bazea ba kontratu,” Pedro Soares akresenta.
Ho konstrusaun sala aula neen bele sufisiente ona tanba daudaun ne’e utiliza sala aula 24 hosi totál estudante na’in-1500 resin no totál funsionáriu inklui profesór permanente no kontratadu hamutuk na’in-73.
Jornalista : Natalino Belo
Editór : Evaristo Soares Martins
