BAUCAU, 12 jullu 2022 (TATOLI) – Sekretaria Estadu Formasaun Profesionál no Empregu (SEFOPE) Munisípiu Baucau durante fulan-janeiru to’o juñu tinan 2022 rejista kazu haat hosi traballadór na’in-neen kompostu mane haat no feto rua.
Diretór Servisu Munisipál SEFOPE Baucau, Romualdo António de Sousa, hateten hosi kazu haat ne’e rejista iha trimestre dahuluk kazu ida no daruak kazu tolu ne’ebé mai hosi kompaña hanesan Sinoma, postu Laga kazu rua, Loja Lorosa’e ida no Loja Bilaichen ida.
“Kazu haat ne’e rezolve hotu iha SEFOPE Baucau, ita laiha transferénsia ba Dili atu kontinua arbitrajen maibé konsege rezolve hotu, parte kompañia selu direitu traballadór hanesan kompensasaun,” Diretór SEFOPE Baucau hateten iha Vila Nova, tersa ne’e.
Bainhira trabalLadÓr sira hato’o keixa, SEFOPE rejista kontinua notifika ba traballadór no kompañia hodi halo mediasaun to datoluk mak laiha solusaun sei kontinua transfere ba nasionál iha faze arbitrajen no bainhira kontinua laiha solusaun sei remata iha tribunál.
SEFOPE Baucau kontinua esforsu atu buka solusaun iha dalan mediasaun nune’e parte rua iha entendimentu hodi solusiona problema hirak-ne’e tanba bainhira kontinua ba arbitrajen prosesu hotu sei iha nasionál nune’e parte rua sei gastu osan transporte inklui tempu tanba distánsia dook.
“Dalabarak liu mak kompañia sira viola traballadór sira-nia direitu, liuliu saláriu,” Romauldo akresenta.
SEFOPE Baucau kontinua sosializa ba traballadór inklui kompañia sira iha Baucau kona-ba lei númeru 4/2021, loron 21 fevereiru ne’ebé regulariza direitu no kna’ar hosi parte dentru kontratu no oras serbisu.
SEFOPE Baucau iha mediador na’in-rua ne’ebé hala’o kna’ar mediasaun hodi buka solusaun ba probelema bainhira traballadór sira hasoru iha fatin serbisu.
Jornalista : Natalino Belo
Editór : Evaristo Soares Martins
