Komunidade hetan materiál espluzivu iha Bobonaro
BOBONARO, 13 jullu 2022 (TATOLI) – Komunidade sira iha loron-segunda ne’e, tuku 21:00 kalan hetan materiál esplusivu ida iha área Galisapulu, suku Lahomea, postu administrativu Maliana,,munisípiu Bobonaro.
“Ita-nia primeiru sarjentu ida mak ho komunidade sira ke’e-rai, sira hetan materiál espluzivu boot ida,” Komandante Operasaun PNTL Munisípiu Bobonaro, Inspetór Xefe Armando Pauf Lafu, ko’alia iha Maliana, tersa ne’e.
Inspetór Xefe ne’e haktuir, hafoin identifika objetu esplizivu ne’e, orienta kedas membru sira dada dadas liña polísia no halo seguransa másimu hodi asegura bomba refere.
“Ami labele muda ba mai tanba ne’e aviza hela ba komunidade, atu labele besik no book, tanba ita la hatene maske ho durasaun tempu naruk, maibé keta halo butaun balu sei funsiona hela, entaun ita buti sala bele fó perigu ba ema-nia vida, di’akliu lalika besik fatin ne’e,” nia hateten.
Nia fundamenta, iha tersa ne’e haruka ona relatoriu ba Komandu Jerál-Polisia Nasionál Timor-Leste (PNTL) atu submete ba ekipa espesializada Explosive Ordnance Disposal (EOD) nune’e iha tempu badak bele rekolla objetu refere atu halo destroisaun iha fatin ne’ebé seguru.
“Tuir loloos ami mós bele foti, maibé tanba ami laiha espesialidade entaun ami hein IOD mai rekolla tiha, depois ba tán iha Atabae mak foin bele halo destroisaun iha fatin ne’ebe defini tuir sira-nia espesialidade,” nia katak.
Iha tinan kotuk membru sira identifika materiál espluzivu ida iha ai-laran postu administrativu Atabae, ne’ebé to’o agora asegura hela ho liña polísia.
Jornalista : Sérgio da Cruz
Editór : Evaristo Soares Martins
