BAUCAU, EKONOMIA, HEADLINE, MUNISÍPIU

Reabilitasaun estrada Ossouala atinje 85%

Reabilitasaun estrada Ossouala atinje 85%

Diretór Obra Públika Munisípiu Baucau, Pedro Alexandre Guterres Pereira. Imajen Tatoli/Natalino Belo.

BAUCAU, 13 jullu 2022 (TATOLI) – Progresu reabilitasaun estrada iha suku Ossouala, postu administrativu Vemase atinje ona 85% no tuir planu sei finaliza iha tinan ne’e.

Diretór Obra Públika Munisípiu Baucau, Pedro Alexandre Guterres Pereira, hateten, projetu refere hahú kontratu iha fulan-juñu tinan 2021 no sei finaliza iha jullu tinan 2022.

Projetu ne’e ho pakote rua hanesan dahuluk distánsia kilómetru 2.5 diresaun hosi aldeia Uaikhanese to’o suku Ossouala no pakote segundu Loilubu ba Ossouala ho distánsia kilómetru 2.5.

“Kuaze kompletu ona, projetu fíziku agora atinje ona 85%. Ha’u garante katak kompañia bele halo hotu serbisu iha fulan-dezembru tinan ida-ne’e nia laran,” Diretór Obra Públika Munisípiu Baucau hateten iha Vila Nova, kuarta ne’e.

Orsamentu hosi projetu reabilitasaun estrada refere aloka hosi fundu infraestrutura hamutuk $673.672,43 ne’ebé fahe ba pakote dahuluk diresaunn Uaikhase ba suku hamutuk $379.137,68 no pakote daruak Loilubu ho orsamentu $258.534,75.

Tuir kontratu, reabilitasaun sei foka ba aterru estrada, hada penahan, gabiaun, valeta inklui cor simentu iha fatin risku hanesan xuvida.

Nune’e Obra Públika Baucau kontinua monitoriza kompañia atu kompleta volume serbisu ne’ebé presiza atu aumenta tuir alterasaun serbisu.

“Ita kontinua fó instrusaun ba kompañia atu hala’o serbisu bazea ba kontratu nune’e obra reabilitasaun estrada iha kualidade,” Pedro Perreira akresenta.

Entretantu, parte kompañia hatama ona pedidu porlongamentu tempu no pedidu pagamentu orsamentu 50% hosi tótal valór orsamentu tuir kontratu.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!