BAUCAU, EKONOMIA, HEADLINE, MUNISÍPIU

MAE sosializa programa PMOPA iha Baucau

MAE sosializa programa PMOPA iha Baucau

PAM Baucau, Olívio 'Bou-Lesa' Freitas hamutuk ho DJDR-MAE, Rosito Guterres bainhira sosializa PMOPA iha CCB vila antiga Baucau, Segunda (18/07). Imajen: Agênsia TATOLI/Natalino Belo

BAUCAU, 18 jullu 2022 (TATOLI) – Ministériu Administrasaun Estatal liuhosi Diresaun Dezenvolvimentu Rurál, segunda ne’e sosializa Programa Mão de Obra Postu Admistrativu (PMOPA) ba autoridade postu no suku sira iha munisípiu Baucau.

Diretór Jerál Dezenvolvimentu Rural, Rosito Guterres, esplika, objetivu  hosi atividade refere atu konsensializa autoridade munisipál, postu no suku ne’ebé hahú ona implementa iha tinan 2021 no komunidade hakarak kontinua tanba impaktu direita ba traballadór informál sira.

“Ami entrega ba administradór postu inklui xefi suku sira deside hamutuk liuhosi asembleia postu, governu sentral akompaña deit, rekursu hotu hatún mai depende ba kapasidade autoridade Baucau,” Diretór Jerál Dezenvolvementu Rurál, hateten iha Sentru Konvensaun Baucau (CCB, sigla portugés).

Governu liuhosi orsamentu retifikativu aloka fundu hamutuk millaun $ 7,2 hodi implementa PMOPA liuhosi transferénsia ba kada konta bankária munisípiu tuir dekretu lei númeru 3/2016 hodi implementa sub atividade hamutuk rihun 35 iha postu 62 iha territóriu nasionál ne’ebé tuir planu sei fó serbisu diária ba traballadór informál purvolta hamutuk rihun 67.

Vantajen hosi programa refere mak kada postu iha orsamentu natoon atu halo ativadade tuir kondisaun postu nian, utiliza osan atu hadi’a jestaun, manutensaun ba sede postu, kria kampu traballu ba traballadór informál liuliu hadi’a ekonomia uma-laran.

PMOPA sei implementa atividade hanesan intervensaun no asegura ambiente ne’ebé moos hanesan limpeza, halo manutensaun ba sistema dreinazen impaktu hosi udan, reparasaun estrada entre suku no aldeia no seluk tán.

“Kuaze kada postu sei hetan orsamentu hamutuk rihun $120 resin,” Rosito Guterres akresenta.

Prezidente Autoridade Baucau, Olívio ‘Bou Lesa’ Freitas, esplika, tinan-ne’e liuhosi PMOPMA sei implementa atividade hamutuk 351 hosi tótal atividade hamutuk 3.353 sei envolve traballadór hamutuk na’in-20 tuir matadalan ne’ebé estabelese ona.

“Ha’u husu tenke iha relatóriu no halo kuotasaun fornesimentu materiál ho loloos,” Bou Lesa hateten.

Bou Lesa husu atu administradór postu neen implementa programa refere ho responsablidade no onestidade tanba orsamentu aloka atu fó benefísia ba povu tuir objetivu hosi PMOPA katak fó impaktu ekonomia direita ba komunidade.

Entretantu prinsípiu fundamentál hosi programa refere hanesan partisipativu, transparante, akuntabilidade, igualidade jéneru, inkluzaun sosiál no responsabilidade.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!