Ekipa konjunta detein tan sidadaun na’in-haat hatama mina ilegál
DILI, 19 jullu 2022 (TATOLI)— Ekipa Konjunta kompostu hosi Polisia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) detein sidadaun timoroan na’in-haat, ne’ebé hatama kombustivél ilegál hosi fronteira, iha área suku Ritabou, postu administrativu Maliana, munisípiu Bobonaro.
Komandante Munisipiu Bobonaro, Superintendente Polisia Antonino Mauluta, konfirma ekipa konjunta halo detensaun ba sidadaun sira ne’e tanba hatama mina liu dalan ilegál iha fronteira.
“Ekipa konjunta kompostu husi SIP Nasionál, SIP-BOP, Sub-seksaun Informasaun munisípiu Bobonaro junta ho F-FDTL, asegura sidadaun timor-oan nain-4 ne’ebé hatama mina ilegál hamutuk masa 13, ne’ebé hatama hosi suspeitu sira ne’ebé hela iha área Uluhatin,” refere nota ne’ebé Agencia TATOLI asesu, tersa ne’e.
Suspeitu sira ne’e ho naran inisiál ML (tinan 50), TL (tinan 32), IdS (tinan 22), no SdJ, (tinan 40) ne’ebé hela iha Suku Saburai.
Nia dehan, hafoin halo aprensaun ba objetu hirak ne’e ekipa konjunta SIP Nasional kontatu kedas mai PNTL Munisipiu Bobonaro hodi entrega evidensia refere ba equipa patrolhamentu inklui asegura evidensia seluk tan iha suspeitu nia uma ne’ebé antes ne’e la konsege deteta.
“Ita halo identifikasaun ekipa konjunta deteta mina nain, orienta kedan membru sira ba iha Suku Memo hodi tula na’in ba mina ho inisiál TeS, feto ida tinan 40 no asegura mina gazoel litru 35 hamutuk masa-haat no suspeitu RaG, tinan 24, ekipa asegura mós mina ilegál litru 35 hamutuk masa-sia,” nia afirma.
Lider másimu PNTL munisípiu Bobonaro ne’e haktuir, daudaun suspeitu hamutuk ho evidénsia asegura ona iha Komandu Munisípiu Bobonaro hodi kontinua halo investigasaun, hafoin submete ba Ministériu Públiku.
Alende ne’e, Batallaun Orden Públika kompañia Delta-Maliana, detein mós sidadaun timoroan na’in haat (4), ne’ebé hatama kombustivél liu dalan ilegál hosi fronteira terrestre Indonézia mai iha Suku Ritabou, Postu Administrativu Maliana, Munisípiu Bobonaro.
Ekipa konjuta identifika suspeitu feto ida ho naran inisiál AS (tinan 33) mak na’in ba objetu no suspeitu nain-tolu seluk ne’ebé fasilita hatama kombustivel mak AV (tinan 30), MdC (tinan 27), NdS (tinan 21).
Enkuantu liuhosi operasaun ne’ebé lidera hosi Komandante BOP Inspetór Rosalino do Santos, akipa hapara karreta kamioneta ida (1) ho númeru matríkula, A.50-724 TLS, ne’ebé tula kombustivél tipu gazoel no gazolina iha jerigen 54 ho totál mina hamutuk litru 1620 litru.
Jornalista: Natalino Costa
Editór : Florencio Miranda Ximenes
