DILI, 19 jullu 2022 (TATOLI)—Ministériu Agrikultura no Peska (MAP) liuhosi Diresaun Nasionál Konservasaun Florestál no Dezenvolvimentu Eko-Turizmu (DNCFDE) halo armazenamentu rai udan-been ba rusa sira iha illa Jaco, munisípiu Lautém.
Diretór Nasionál Konservasaun Florestál no Dezenvolvimentu Eko-Turizmu, João Antalmo Ferreira, hateten, sira-nia parte halo armazenamentu rai udan ne’e tanba tempu bailoron naruk rusa sira buka bee susar.
“Ida-ne’e ita halo ho objetivu labele lori bee hosi Pitileti bá Jaco, entaun tinan ida-ne’e ita aproveita udan-been halo armazenamentu rai udan-been ba tempu bailoron naruk, nune’e rusa bele uza ona bee ne’e, tanba antes ne’e ita lalin bee hosi rai-maran bá Jaco,” Diretór hateten ba Agência Tatoli, iha niania knaar fatin, Caicoli, tersa ne’e.
Notísia relevante: “Rusa Sira Hadau Bee Iha Illa Jaco”
Armazenamentu ne’e harii hosi empreza lokál no ramata ona, nune’e kuarta semana ne’e sei entrega ba MAP atu jere.
“Iha Jaco ita tau guarda florestál ida mak sei toma konta ba armazenamentu bee no profil ne’ebé ita prepara hamutuk litru 12.000, tanba ita prepara profil neen, ne’ebé kada profil ida bele akumula bee litru 12.000,” nia akresenta.
Armazenamentu rai udan-been ne’ebé empreza prepara ba rusa instala iha fatin ida, enkuantu fatin bee ba rusa atu hemu iha haat no tau ketak-ketak, ne’ebé hosi fatin hemu bee bá armazenamentu ho distánsia metru 50 to’o 100.
“Rusa ne’ebé daudaun ne’e seguransa guarda florestál kuidadu iha Jaco ne’e hamutuk 200 resin. Orsamentu ne’ebé ita aloka halo armazenamentu bee ne’e hamutuk $24.000,” nia tenik.
Jornalista : Arminda Fonseca
Editora : Julia Chatarina
