DILI, 19 jullu 2022 (TATOLI)—Prezidente Conselho de Imprensa (CI), Virgílio da Silva Guterres, husu Agência TATOLI, Institutu Públiku (TATOLI, I.P) tenke hakle’an kapasidade krítiku no investigative ba iha sosiedade.
Prezidente CI hateten kestaun iha ambítu Agência TATOLI atu selebra aniversáriu ba dala-neen (6) ne’ebé sei komemora iha loron 27 fulan-jullu tinan ida-ne’e.
Notísia Relevante: PR Horta enkoraja TATOLI kontinua públika informasaun loos ba públiku
“CI hein katak, tinan ne’e Agência TATOLI kompleta tinan neen (6) tenke krítika no haree oinsá atu hakle’an kapasidade kritítika no investigativu ba iha sosiedade, nune’e mós tenke konsentra ona ninia atividade iha área remota sira, atu nune’e ita-nia sosiedade sira bele asesu ba informasaun ne’ebé TATOLI fó sai,” Virgílio da Silva Guterres hateten ba Agência TATOLI, iha nia kna’ar fatin Quintal Boot, Dili.
Razaun, nia dehan, durante ne’e Agência TATOLI nia produtu ne’e sei deskritivu ka serimoniál hela tanba seidauk halo notísia ida kona-ba investigativu ba faktu ruma no eventu sira, maske TATOLI mosu ona ho lingua tetun, portugés, inglés no dalaen maláiu (indonézia).
“Buat di’ak mak TATOLI mosu ho lingua tetun, portugés, indonézia no inglés. Entaun ha’u hanesan públiku ne’ebé presiza haree mak konteúdu analítiku no konteúdu krítiku, investigativu no kestiona saida mak iha eventu ne’e nia kotuk,” Virgílio hateten.
Ezemplu, kazu korupsaun, igualdade jéneru, kazu defisiénsia nian no kazu defisiénsia ne’e la’ós halo ema-nia perfil maibé oinsá polítika inkluzaun atu haree no inklui ema sira-ne’e.
“Ita labele uza ema ho defisiénsia hodi halo asaun karidade maibé oinsá ema ho defisiénsia, portadora, minoria sira atu oinsá partisipa mós iha dezenvolviementu nasionál. Entaun mídia ne’ebé Governu no Estadu estabelese ne’e atu haree ba asuntu ida-ne’e,” nia dehan.
Iha tinan 2022 ne’ebé Agência TATOLI selebra aniversáriu bad ala-neen (6) ne’e, nia sujere ba Agência TATOLI atu hahú ona ho notísia investigativu no kritítiku, labale mai ho notísia deskritivu hela de’it.
“Ba oin, TATOLI tenke investigativu no kritítiku hodi públika semana ida dala ida mós di’ak, ida-ne’e mak tenke halo hela de’it. Depois TATOLI nia informasaun tenke diferensa ho mídia sira seluk maibé TATOLI mak tenke iha oin,” nia hateten.
Tanba ne’e, nia rekomenda ba Governu tenke apoiu Agência TATOLI atu iha korespondente iha munisípiu sira iha Timor-Leste no bele mós iha rai-li’ur, nune’e Primeiru-Ministru, Prezidente Repúblika ka membru Governu ba rai-li’ur karik la presiza lori jornalista hosi Dili mak ba.
“Governu fó apoiu ba Agência TATOLI hanesan institutu ida la’ós apoiu hanesan dirasaun ida. Se Governu no Estadu hakarak TATOLI iha fatin hotu-hotu mak tenke buka rekursu umanu ne’ebé ho nível lisensiatura (S1 no S2) nune’e bele halo krítiku, maibé osan tuir ema lisensiadu nian,” nia hateten.
Ho ida-ne’e, Estadu liuhosi Governu ho TATOLI halo planu ne’ebé di’ak ba dezenvolvementu TATOLI nian no prevee orsamentu ne’ebé visibilidade ba kobertura iha nasionál no Internasionál.
“Se ita sura biolojikamente tinan sei kiik maibé hanesan instituisaun ne’ebé Estadu harii atu servi públiku, ha’u hanoin, tinan neen naton ona atu halo reflesaun katak tinan neen TATOLI halo saida,” nia dehan.
Aleinde ne’e, nia dehan, iha fatin barak rede telekomunikasaun ladún di’ak entaun populasaun barak mak labele asesu ba notísia, entaun oinsá TATOLI nia notísia bele enkoraja Governu no Estadu atu hadi’a infraestrutura telekomunikasaun iha área remota sira.
“Baibain lider sira dehan TATOLI tenke tama to’o lidun hodi fó informasaun no foti realidade hosi ita-nia sosiedade ba ita-nia ukun na’in sira, nune’e sira bele hala’o haree no hatene saida mak sosiedade enfrenta iha área remota,” nia esplika.
Iha aniversáriu Agência TATOLI bad ala-neen (6) ne’e, Prezidente Conselho de Imprensa (CI), Virgílio da Silva Guterres, lori Conselho de Imprensa nia naran fó votu parabéns ba aniversáriu Agênsia TATOLI ba dala-VI ne’e.
Jornalista : Osória Marques
Editór : Cancio Ximenes
