HEADLINE, SEGURANSA

PNTL enfrenta problema rekursu umanu hodi asegura fronteira terrestre

PNTL enfrenta problema rekursu umanu hodi asegura fronteira terrestre

Vise-Ministru Interiór, António Armindo, hala'o vizita ba formatura membru PNTL sira. Iha resintu UEP, tersa (03/05). Imajen Tatoli/Francisco Sony

DILI, 20 jullu 2022 (TATOLI)— Vise Ministru Interiór (MI), António Armindo, rekoñese katak Polisia Nasionál Timor-Leste (PNTL) enfrenta hela problema rekursu umanu, nune’e defisil kontrola negósiu ilegál iha fronteira terrestre  entre Timor-Leste ho Indonézia.

“Polisia Nasionál Timor-Leste (PNTL) liuliu membru Unidade Patrullamentu Fronteira (UPF) menus rekursu umanu  hodi koloka iha liña fronteira terestre , nune’e atividade ilísitu iha semana ne’e nia laran sa’e makas tebes,” Vise Ministru Interiór, António Armindo, hateten ba jornalista sira iha Palásiu Governu, kuarta ne’e.

Notísia relevante:PNTL hetan tetu agregadu millaun $40 iha OJE 2023

Maske, ekipa konjunta PNTL no FALINTIL-Forsa Defeza Timor-Leste (F-FDTL) kontinua detein no halo apreensaun ba sidadaun no sasán ilegál, maibé movimentasaun ilegál kontinua akontese tanba membru la sufisiente atu koloka ba postu seguransa sira.

Tanba, Governante ne’e dehan rekursu umanu no fasildiade mak fatór importante atu prevene no asegura movimentasaun ema no sasán ilegál hosi liña fronteira marítima.

“Ita nian área fronteira ne’e ho distánsia ne’ebé dook malu, maibé rekursu umanu menus, entaun ita nian ema sira ne’e aproveita lakunas sira hodi halo negósiu ilegál hanesan mina no sasan nesesidade báziku seluk,” nia rekoñese.

Nune’e, Vise Ministru ne’e afirma iha tinan oin (2023), MI no Komandu PNTL planeia atu halo rekrutamentu ba ajente foun hodi bele apoia membru ezistente asegura liña fronteira Terrestre.

“Ita planu atu koloka efetivu balun tan ba iha liña fronteira hodibele asegura atividade ilegál ne’ebé akontese iha fronteira,” nia afirma.

Ezekutivu ne’e mós husu ba komunidade sira atu koopera ho autoridade polisiál hodi asegura no kontrola atividade ilísitu sira iha fronteira.

“Ita nia komunidade sira hala’o negósiu ilegál tanba nesesidade ida, maibé husu ba ita nia komunidade sira tenke kontribui hodi seguransa ba liña fronteira. Tanba seguransa la’ós polisia de’it, maibé ita hotu nia responsabilidade,” nia sujere.

Notísia relevante:Governu aprova tetu agregadu OJE 2023 biliaun $1,8

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!