DESPORTU, DILI, HEADLINE

Aban, atleta nasionál hosi modalidade haat arranka bá Tailándia

Aban, atleta nasionál hosi modalidade haat arranka bá Tailándia

Prezidente Federasaun Akademika Desportu Timor – Leste (FADTL), Zeferino Viegas Tilman.Imajen Tatoli/António Gonçalves

DILI, 21 jullu 2022 (TATOLI)– Prezidente Federasaun Akademika Desportu Timor – Leste (FADTL), Zeferino Viegas Tilman, informa atleta hosi modalidade haat hanesan, Xadres, Atletizmu, Taekwondo no Voleiból Praia, sesta (22/07), arranka bá Tailándia hodi partisipa eventu ASEAN University Games (AUG) 2022.

“Orsamentu hosi Governu minimu loos ne’ebé  ita tenke redúz atleta, nune’e ita lori de’it atleta na’in-12 hosi modalidade haat no ita tenke husik ka kansela modalidade futeból tanba forsa orsamentu mak la to’o,” Prezidente Zeferino hateten ba Jornalista-sira iha UNTL Dili, kinta ne’e.

Notísia relevante:TL hahú prepara partisipa ASEAN University Games iha Tailándia

Nia dehan, FADTL hala’o komunikasaun entre Sekretariu Estadu Juventude no Desportu (SEJD) ho Federasaun Futeból Timor-Leste (FFTL) fó garante katak futeból bá partisipa, maibé iha loron hira ikus FADTL simu informasaun hosi FFTL katak futeból laiha posibilidade partisipa iha eventu ne’e.

“Ami simu informasaun hosi FFTL laiha kondisaun finanseiru atu lori ita nia jogadór futeból sira ba partisipa iha eventu ne’e,” Zeferino dehan.

Nia akresenta, kanselamentu futeból iha eventu ne’e fó impaktu boot ba modalidade futeból tanba sei hetan sansaun hosi komisaun kompetisaun eventu rejonál ne’e.

Maibé, Prezidente FADTL garante sei hasoru malu ho komisaun kompetisaun atu ko’alia kondisaun Timor-Leste nian atu labele iha sansaun ne’ebé todan.

“Tuir informasaun ne’ebé ami (FADTL) hetan katak antes ne’e reuniaun FFTL ho SEJD konkorda malu ona atu Governu mak responsabiliza ba buat hotu no FFTL responsabiliza ba billete aviaun ba jogadór sira, maibé too ikus laiha billete aviaun, nune’e tenke kansela futeból nia partisipasaun,” katak nia.

Ho asuntu ne’e, Agência TATOLI tenta konfirma ho parte FFTL, maibé okupadu ho servisu esensiál balun. Enkuantu totál orsamentu ne’ebé SEJD apoia ba eventu ne’e hamutuk $200.000.

ASEAN University Games (AUG) 2022 hanesan eventu rejionál ida ne’ebé halo kada tinan haat dala-ida no sei partisipa hosi Universidade iha ASEAN ne’ebé kompostu hosi nasaun 11 hanesan, Indonézia, Malázia, Tailándia, Singapura, Laos, Myanmar, Kamboja, Brunei Darusalam, Filipina no Timor-Leste.

Notísia relevante:FATL deside atleta Felisberto bá partisipa ASEAN University Games

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!