DILI, 25 jullu 2022 (TATOLI)—Deputadu hosi bankada KHUNTO no atuál segundu vise Prezidente Parlamentu Nasionál, Luis Roberto, husu mídia estatál Agência TATOLI atu destaka tan nia jornalista kompleta ba iha munisípiu hotu hodi bele kobre informasaun hosi baze mai nasionál.
Notísia Relevante: Bankada PLP husu Agência TATOLI tenke sai mídia krítiku-independente
“Ha’u-nia hakarak maka ba oin ita presiza hodi rekruta tan ita-nia funsionáriu sira ba iha Tatoli ninian bele estabelese iha munisípiu hotu, nune’e ita hotu-hotu asesu ba informasaun,” Deputadu Luis Roberto hateten iha ambitu komemorasaun aniversáriu Agência TATOLI ba dala-VI ne’ebé selebra iha 27 jullu tinan ne’e.
Dadaun ne’e Agéncia Tatoli destaka ona nia jornalista iha munisípiu lima hanesan Baucau, Covalima, Bobonaro, Viqueque ho Rejiaun Administrativa Espesiál Óe-Cusse Ambeno (RAEOA).
Tuir nia, observasaun durante ne’e TATOLI ninia publikasaun notísia sira kualidade maibé funsionáriu no jornalista sira presiza nafatin kapasita an hodi fó sai notísia sira ho kualidade liután.
Deputadu hosi bankada Governu ne’e hateten, atu dezenvolve mídia estatál ne’e ho di’ak liután mak Governu presiza aloka orsamentu naton hodi kobre nesesidade ba ekipamentu, rekursu umanu no sira seluk.
“Ha’u haree durante ne’e informasaun ne’ebé adekuadu no klaru hosi Tatoli ne’e hakerek kapaas tebes, tanba ne’e mak mellora liután servisu mak presiza Governu fó apoiu makaas,” nia hateten.
Deputadu ne’e lori bankada KHUNTO nia naran, hato’o parabéns ba funsionáriu no jornalista tomak iha Tatoli, dezeju susesu nafatin ba oin hodi servi povu liuhosi habelar informasaun ba públiku.
Jornalista : Nelson de Sousa
Editór : Cancio Ximenes
