DILI, 28 jullu 2022 (TATOLI)—Revizór língua iha Gabinete Prezidensiál Konsellu Ministru, Ricardo Antunes, hateten iha futuru Agência TATOLI tenke kontinua mantein no garante independénsia iha reportajen.
Notísia Relevante: Don Virgílio: Servisu Agência TATOLI nakonu ho dedikasaun ba povu TL
“Futuru Agência TATOLI kontinua mantein no garante independénsia ba ninia reportajen,” Ricardo Antunes hateten ba Ajénsia TATOLI, iha Palásiu Governu, Dili.
Revizór língua ne’e hateten, iha Timor-Leste, seidauk iha format hanesan halo reportajen boot kona-ba asuntu importante ruma maibé iha reportajen ba notísia baibain de’it.
“Ha’u fó ha’u-nia sujestaun iha área rua, halo dezenvolvimentu se ita kompara ho jornál ruma ne’ebé fó sai notísia iha Timor-Leste no mós iha nasaun seluk. Iha Timor ita seidauk iha formatu hanesan halo reportajen kle’an ka notísia investigatovu kona-ba asuntu boot ruma maibé iha notísia regulár ka notísia strigth news de’it,” nia dehan.
Tanba, haree iha publikasaun notísia loro-loron nian iha notísia regular maibé hakarak hatene notísia reportajen kle’an ho faktu no dadus, presiza mós halo dezenvolvimentu ba reportajen semana-semana la’ós loron-loron.
“To’o agora, iha uitoan de’it mak halo reportajen kle’an entaun ha’u hanoin presiza dezenvolve, tanba ne’e importante. No ha’u admira kona-ba língua ne’ebé esforsu hosi jornalista sira maibé TATOLI rasik mós halo ida-ne’e, presiza hadi’a produsaun no tenke tuir formasaun hodi aumenta koñesimentu,” Ricardo hateten.
Tanba, tuir nia, laiha formasaun sólida ba jornalista sira liu-liu língua entaun sei mosu erru barak iha konteúdu notísia.
“Entaun ita hanoin notísia ne’e laiha kualidade língua no kualidade notísia kona-ba konteúdu, entaun signifika katak konteúdu importante hosi notísia maneira atu hakerek,” profesór ne’e dehan.
Hosi ne’e, iha pilar tolu importante hanesan introdusaun no manutensaun no mós lian, tanba iha Timor-Leste uza lian ofisiál rua mak tetun ho portugés.
“Entaun pilar tolu hanesan ida mak edukasaun, administrasaun no komunikasaun sosiál. Tanba sistema edukativu ema aprende no bele uza iha elaborasaun notísia, depois kona-ba administrasaun, sistema administrasaun públika, se ita uza lian ofisiál di’ak liután no komunikasaun sosiál ne’e importante tebes,” nia dehan.
Maibé, funsaun prinsipál la’ós hanorin língua ba populasaun maibé importante hosi língua sai informasaun sekundária, ho ne’e tenke hadi’a no dezenvolve reportajen no hadi’a língua hodi halo dezenvolviementu ida ba futuru.
“Tuir ha’u-nia hanoin, Agência Notícia hanesan TATOLI importante tebes ba nasaun ida, se haree iha mundu pratikamente nasaun hotu-hotu iha Agência notísioza no sira dezenvolve estrutura sira hanesan ne’e, presiza garante independénsia hosi fonte notísia sira,” nia hateten.
Baibain órgaun komunikasaun iha nia importánsia mós maibé sira liga ba interrese ekonómika ka interrese polítiku, entaun agência notísioza importante tebes atu garante independénsia, notísia sira la mai ho interferénsia hosi poder ka influénsia seluk.
“Ha’u haree notísia TATOLI, pratikamente hosi inisiu, ha’u akompaña no kuriozidade tanba nasaun hanesan Timor-Leste la’ós uza língua ida maibé uza língua haat (tetun, portugés, indonézia no inglés), maibé hanesan Portugal ne’e dezáfiu boot tanba la’ós de’it prepara jornalista atu halo notísia maibé purezemplu TATOLI halo notísia uza língua haat, ne’e la’ós dezáfiu simples,” nia dehan.
Tanba haree nasaun barak, maiória ajénsia notísia laiha kbiit ka laiha kapasidade atu halo ida-ne’e maibé TATOLI maske kiik konsege halo ida-ne’e, importante tebes ba nasaun no hatudu mós kapasidade hodi uza língua barak no konsege divulga informasaun sira ho klareza no objetividade.
“Ita haree hosi panorama TATOLI nian barak-barak, ita haree área ekonómia, sosiál, polítika, saúde, edukasaun no ida-ne’e hatudu katak iha kresimentu la’ós de’it kona-ba númeru, maibé ha’u kresimentu kona-ba área espesializada, ita bele buka informasaun ruma. Ha’u hakarak buka informasaun kona-ba área ekonómika ita buka iha ita-nia portál, ita bele hetan,” Revizór língua PCM ne’e hateten.
Jornalista : Osória Marques
Editór : Cancio Ximenes
