BAUCAU, HEADLINE, MUNISÍPIU, SEGURANSA

Membru PNTL na’in-25 tuir formasaun iha Baucau

Membru PNTL na’in-25 tuir formasaun iha Baucau

Membru PNTL Baucau hamutuk na'in-25 tuir treinamentu kona-ba tranzitu hosi komando nasionál, Segunda (01/08). Imajen: Agênsia TATOLI/Natalino Belo.

BAUCAU, 01 agostu 2022 (TATOLI) – Membru Polísia Nasionál Timor-Leste (PNTL) munisípiu Baucau na’in-25, segunda ne’e tuir formasaun hosi departamentu tránzitu nasionál kona-ba tránzitu iha Baucau nune’e komprende didi’ak dekretu-lei númeru 6/2003.

Diretór Departamentu Tránzitu no Seguransa Roduviária Nasionál (DDTSR-PNTL), Superintendente Asistente, Albino Mouzinho, esplika, formasaun ne’e bazea ba orientasaun tolu hosi komandu PNTL kona-ba tránzitu hanesan mudansa, transformativu no modernativu.

“Mudansa ida-ne’e mai hosi formasaun, koñesimentu ka abilidade natoon hosi pesoál polísia idak-idak atu serbisu komunidade iha territóriu nasionál ho di’ak no bele sai exelente,” Superintendente Asistente Albino Mouzinho hateten iha Vila Nova.

Membru na’in-25 kompostu hosi seksaun tránzitu, forsa rezervadu, ofisiál polísia suku (OPS) no eskuadra ho durasaun loron-lima. Matéria ba Formasaun ne’e kona-ba koñesimentu bázika kona-ba dekretu lei númeru 3/2003, loron 6 abríl kona-ba kódigu estrada.

Objeitivu hosi formasaun ne’e halo prevensaun ba infrasaun tránzitu hodi redús númeru asidente iha territóriu nasionál.

Komandante PNTL Baucau, Superintendente António de Sá, esplika, formasaun refere atu responde polítika komandu PNTL hanesan polísia prosimilidade no vizibilidade ba involvimentu profisionál.

Alende ne’e, kada-fulan diresaun tránzitu no seguransa roduviária PNTL ezekuta polítika Ministériu Interior (MI) lideradu Primeiru Ministru Taur Matan Ruak, kona-ba rekolla reseita ba kofre estadu.

“Ho atividade sira-ne’e automatikamente redús ona gráfika krime, liuliu tráfiku asidente sira,” António de Sá akresenta.

PNTL Baucau kontinua sosializa dekretu-lei kódegu estrada ba motorista sira-ne’ebé utiliza estrada públiku tuir regra ne’ebé establese ona hosi estadu hanesan uza kapasete, kumpri sinál tránzitu, redús velosidade, kompleta dokumentu no evita labele konsumu alkól.

PNTL Baucau rejista membru seksaun tránzitu hamutuk na’in-16 ne’ebé seidauk sufisiente atu kobre iha munisípiu Baucau tanba área ne’ebé luan no númeru populasaun ne’ebé barak.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!